Iconologie (Cesare Ripa, 1643)/Au lecteur
Av lectevr.
Oicy L’ICONOLOGIE, Lecteur, que ie vous donne
augmentée d’vn ſecond Volume, dont les Diuersitez
pleines de curieuſes recherches, vous feront
trouuer dans cette nouuelle Edition dequoy vous
diuiertir agreablement. Ie me le perſuade ainſi, à
cauſe que ce qui s’en eſt imprimé cy-deuant, n’a pas deſpleu aux
honneſtes gens, & particulierement à ceux qui ſe connoiſſent aux
bonnes choſes. Mais il eut encore eſté mieux receu, ſi Celuy qui en
a graué les Figures, pour s’eſtre voulu meſler de les debiter luy
meſme, ne ſe fût rendu ſi odieux à quelques Libraires, que par
diuers artifices ils ont retardé la vente de ce Liure, afin de faire
perdre l’enuie de l’acheter à ceux qui les demandoient dans leurs
Boutiques. Cela n’a pas empeſché pourtant qu’on ne ſe ſoit ſi bien
desfait de la premiere Impreſsion, qu’il n’en reſte plus aucune copie.
A raiſon dequoy, pour contenter le deſir des Curieux, qui
ſçauent qu’en toutes les Profeſsions que l’on eſtime le plus, il n’y a
point de ſecret ſi rare, ny de connoiſſance ſi cachée, dont il ne ſoit fait
mention dans cét Ouurage ; l’on s’eſt aduisé de le remettre en lumiere,
& d’y ioindre une ſeconde Partie, pour faire de les deux
enſemble un Corps entier ; Et par conſequent vous donner moyen
de profiter plus amplement de cette Lecture. Que ſi vous en recueillez
quelque fruict, comme ie n’en doute pas, Ie vous aduiſe,
Lecteur, que vous en aurez l’obligation au Sieur Cappitain,
à qui, ſans le flatter, on peut donner à bon droict la gloire d’auoir
mis en leur luſtre ces Emblemes. Car c’eſt luy qui en a fait la principale
deſpenſe ; & qui meſme apres la mort du Graueur, aduenuë
depuis peu, n’a rien eſpargné pour en recouurer les Cuiures ;
comme en effet il les a dégagez de ſes deniers propres : A faute
dequoy, & à moins que de faire de nouueaux frais pour de nouuelles
Figures, cette ſuitte de l’Iconologie ne pouuoit eſtre acheuée.
Maintenant donc qu’elle voit le iour, Vous m’obligerez bien fort, Lecteur, d’en excuſer les fautes, ſoit que l’Imprimeur les ait cauſées,
ſoit que ie les aye moy-meſme laiſſé paſſer. Car il eſt vraysemblable
que vous y en trouuerez pluſieurs, qu’il m’a eſté impoẞible
de preuenir par mes ſoings ; mon indiſpoſition ne m’ayant
pû permettre de voir les Eſpreuues ſur ma Copie, que i’ay la plus
part du temps dictée du lict à meſure qu’elle s’eſt imprimée.
Adieu.