Ouvrir le menu principal
Texte établi par Charles Marty-LaveauxAlphonse Lemerre (p. 36-38).

Les couleurs & liuree de Gargantua.

Chapitre IX.



Les couleurs de Gargantua feurent blanc & bleu, comme cy dessus auez peu lire. Et par icelles vouloit son pere qu’on entendist que ce luy estoit vne ioye celeste. Car le blanc luy signifioit ioye, plaisir, delices, & resiouissance, & le bleu, choses celestes.

I’entends bien que lisans ces motz, vous mocquez du vieil beuueur, & reputez l’exposition des couleurs par trop indague, & abhorrente : & dictes que blanc signifie foy : & bleu, fermeté. Mais sans vous mouuoir, courroucer, eschaufer, ny alterer (car le temps est dangereux) respondez moy si bon vous semble. D’aultre contraincte ne vseray enuers vous, ny aultres quelz qu’ilz soient. Seulement vous diray vn mot de la bouteille.

Qui vous meut ? qui vous poinct ? qui vous dict que blanc signifie foy : & bleu fermeté ? Vn (dictes vous) liure trepelu qui se vend par les bisouars & porteballes, au tiltre : Le blason des couleurs. Qui l’a faict ? Quiconques il soit, en ce a esté prudent qu’il n’y a poinct mis son nom. Mais au reste, ie ne scay quoy premier en luy ie doibue admirer, ou son oultrecuidance, ou sa besterie.

Son oultrecuidance, qui sans raison, sans cause, & sans apparence, a ausé prescripre de son autorité priuee quelles choses seroient denotees par les couleurs : ce que est l’vsance des tyrans qui voulent leurs arbitre tenir lieu de raison : non des saiges & scauans qui par raisons manifestes contentent les lecteurs.

Sa besterie : qui a existimé que sans aultres demonstrations & argumens valables le monde reigleroit ses deuises par ses impositions badaudes.

De faict (comme dict le prouerbe, à cul de foyrad tousiours abonde merde) il a trouué quelque reste de niays du temps des haultz bonnetz : lesquelz ont eu foy à ses escripts. Et selon iceulx ont taillé leurs apophthegmes & dictez : en ont encheuestré leurs muletz : vestu leurs pages, escartelé leurs chausses, brodé leurs guandz : frangé leurs lictz : painct leurs enseignes : composé chansons : & (que pis est) faict impostures & lasches tours clandestinement entre les pudicques matrones.

En pareilles tenebres sont comprins ces glorieux de court & transporteurs de noms : lesquelz voulens en leurs diuises signifier espoir, font protraire vne sphere : des pennes d’oiseaulx, pour poines : de l’ancholie, pour melancholie : la Lune bicorne, pour viure en croissant : vn banc rompu, pour bancque roupte : non & vn alcret, pour non durhabit : vn lict sans ciel, pour vn licentié. Que sont homonymies tant ineptes, tant fades, tant rusticques & barbares, que l’on doiburoit atacher vne queue de renard au collet, & faire vn masque d’vne bouze de vache à vn chascun d’iceulx qui en vouldroit dorenauant vser en France apres la restitution des bonnes lettres.

Par mesmes raisons (si raisons les doibz nommer, & non resueries) ferois ie paindre vn penier : denotant qu’on me faict pener. Et vn pot à moustarde, que c’est mon cueur à qui moult tarde. Et vn pot à pisser, c’est vn official. Et le fond de mes chausses, c’est vn vaisseau de petz. Et ma braguette, c’est le greffe des arrestz. Et vn estront de chien, c’est vn tronc de ceans, ou gist l’amour de m’amye.

Bien aultrement faisoient en temps iadis les saiges de Egypte, quand ilz escripuoient par lettres qu’ilz appelloient hieroglyphiques. Lesquelles nul n’entendoit qui n’entendist, & vn chascun entendoit qui entendist la vertu, proprieté, & nature des choses par icelles figurees. Desquelles Orus Apollon a en Grec composé deux liures, & Polyphile au songe d’amours en a d’auantaige exposé. En France vous en auez quelque transon en la deuise de monsieur l’Admiral : laquelle premier porta Octauian Auguste.

Mais plus oultre ne fera voile mon equif entre ces gouffres & guez mal plaisans. Ie retourne faire scale au port dont suis yssu. Bien ay ie espoir d’en escripre quelque iour plus amplement : & monstrer tant par raisons philosophicques, que par auctoritez receues & approuuees de toute ancienneté, quelles & quantes couleurs sont en nature : & quoy par vne chascune peut estre designé, si dieu me saulue le moulle du bonnet, c’est le pot au vin, comme disoit ma mere grand.