Balades d’estranges façon/I
BALADES D’ESTRANGE FAÇON
BALADE RETROGRADE
QUI SE DIT A DROIT ET A REBOURS[1]
Doulçour, bonté, gentillece,[2]
Noblece, beaulté, grant honnour,
Valour, maintien et sagece,
Humblece en doulz plaisant atour,[3]
Conforteresse en savour,[4]
Dueil angoisseux secourable,
Acueil bel et agreable.
Flour plaisant, de grant haultece[5]
Princece, ma prisiée amour,
Tour forte, noble fortresse,
Largece en honneste séjour,
Deesse, estoille, cler jour,
Oeil, mirouer aimable,
Acueil bel et agreable.
Coulour fine, vraie adrece,[6]
Tresce blonde, et bonne oudour,
Ardour, souesve simplece,[7]
Parece sanz nulle foulour,
Lucrece de simple cremour,
Brueil de soulas delictable,
Acueil bel et agréable.
Maistresse loyal, ma tenrour,[8]
Leesse plaisant, ma doulour,
Vueil dire a vous trés louable
Acueil bel et agreable.