◄ Laisse LXXX | Laisse LXXXI | Laisse LXXXII ► |
LXXXI[1]
Ja de meillor nulle n’orrez, ce croi,
Do duc Rollant qe par la droite foi
Deigna combatre Feragu l’Espanoi,
Le grant, le fort, le fiers, le plans d’orgoi.
En grant dotance fu le duc cele foi
Che l’Arabi le portoit devant soi,
E quant fu estors de ses mains, ne fu poi.
Mais tant fu grant le colp, se dir le doi,
Che lui dona li niés li jantil roi
Che li Paiens fu de grant pece quoi.
Quant recovrez fu le bon brant Turchoi,
Si comença a escrimir en Françoi.
S’il lui quidast avoir feit tant ennoi,
Avant che l’Arabi fust revenuz en soi,
Feruç l’eüst o quatre colp o troi.
Mais qui seüst do verai le secroi,
N’avroit paor che lui fesist desroi.