Agnès de Navarre-Champagne - Poésies, 1856.djvu/Chanson royale
CHANSON ROYALE.
Amis, je t’ay tant amé et chiéri (30)
Qu’en toy amant me cuidoie sauver,
Lasse, dolente, et je ne puis en ti,
M’en ton dur cuer nulle douceur trouver
Pour ce de moy veil hors joie bouter
Et renoier amours d’or en avant,
Sa loy, son fait et son faus convenant ;
Quant tu portes son viaire de fée :
Cuer de marbre, couronné d’aymant,
Ourlé de fer, à la pointe acérée.
Quant ta biauté mon cuer en toy ravi,
Amours me volt si fort énamourer
De ton gent corps, coint, appert et joli
Que puis ne pas autre que toy amer.
Or ne me vues oïr ne esgarder.
Si n’ameray jamais en mon vivant,
— 34 —
Ne fiance n’aray, si bien suy avisée,
Cuer de marbre, couronné d’aymant,
Ourlé de fer, à la pointe acérée.
Si je me plaing et di souvent : Aimmi !
Qu’en puis je mais ? Ne doy je bien plourer ;
Car je n’ai pas la peine desservi
Qu’il me convient souffrir et endurer.
Elle me fait trembler et tressuer,
Feindre, paslir, frémir en tressaillant,
Quant pour ma mort voy en corps si vaillant,
Ouvertement, de fait et de pensée,
Cuer de marbre, couronné d’aymant,
Ourlé de fer, à la pointe acérée.
Honteuse suy quant je parole ainssy,
Et laidure est seulement dou penser,
Qu’il n’appartient que dame à son ami
Doie mercy ne grâce demander :
Car dame doit en riant refuser,
Et amis doit prier en souspirant,
Et je te pri souvent et en pleurant.
Mais en toi truis, quant plus suy esplorée,
Cuer de marbre, couronné d’aymant,
Ourlé de fer, à la pointe acérée.
Si ne te prier jamais faire depri
N’amours servir, n’obéir, ne loer :
Puisque raisons et mesure en oubli
Sont où tous biens deussent habiter :
Et soit ainssi, comme il porra aller,
— 35 —
Qu’amours et toy et joye à Dieu commant,
Et non pourquant je veil en ton commant
Estre, et sait tant comme j’aray durée,
Cuer de marbre, couronné d’aymant,
Ourlé de fer, à la pointe acérée.
ENVOY.
Princes, onques ne vi fors que maintenant (31),
Amant à cuer plus dur qu’un diamant
Ourlé de fer, à la pointe acérée.