Virelays/V

Christine de Pisan

Belle ou il n’a que redire

Virelays, Texte établi par Maurice Roy, Firmin Didot, 1886 (p. 105-106).

V

Belle ou il n’a que redire,
De qui l’en ne peut mesdire,^[1]
Sanz mentir,
Or vous vueilliez consentir
A estre de mes maulz mire ;
Car Amours m’a fait eslire
Vous que j’aim sanz alentir.

Regardez ma voulenté,
Et comment entalenté
Suis par desir
D’obeir a vo bonté ;^[2]
Car vous avez surmonté^[3]
A vo plaisir^[4]

Mon cuer qui ne puet desdire^[5]
Vo vueil, mais trop grief martire^[6]
Fault sentir
A moy qui n’en vueil partir
Pour riens, car je ne desire
Fors vous, sanz y contredire,
Que j’aim sanz ja repentir,
Belle ou il n’a que redire.

A vous qui m’avez dompté^[7]
Je me suis tant guermenté
A long loisir,
Si doy bien estre rente
Des biens, dont avez plenté ;
Doncques choisir

Vueillés moy si que souffire
Vous daigne sanz escondire,
Car partir
Ferez mon cuer com martir,
Si que le mal qui m’empire^[8]
Ostez, car trop me martire ;
Et vous vueilliez convertir,^[9]
Belle ou il n’a que redire.

1. V. — 2 B D. q. nulz ne p. m.
2. — 11 A¹ D’o. et talenté — B De servir vostre bonté
3. — 12 A¹ De servir car s.
4. — 13 A¹ A vou
5. V. — 14 A¹ M’avez sy ne puis d.
6. — 15 A¹ Vou v.
7. — 22 A' ¹ donbté
8. — 32 B Doncques le m.
9. — 34 A² Or