Ronsard - Œuvres, Buon, 1587/I’ay touſiours celé les fau
’Ay touſiours celé les fautes
Dont mes amis ſont tachez,
I’ay touſiours teu leurs pechez,
Mais non pas leurs vertus hautes :
Car moy qui ſuis leur ſonneur
Et le courrier des merites,
Ie n’employe mes Charites
Qu’au ſeul trafiq de l’honneur,
Que le Ciel large donneur
Ayant pareil ſoin de toy,
T’a departy comme à moy,
Verſant en ta Poëſie
Vn ſainct treſor de beaux vers,
Mais pluſtoſt vne Ambroſie
Qui s’eſpand par l’Vniuers.
Maint chemin nous peut attraire
Pour venir à la vertu :
D’vn bien vn tel eſt veſtu,
L’autre d’vn autre au contraire.
Premier i’ay dit la façon
D’accorder le luth aux Odes,
Et premier tu t’accommodes
A la tragique chanſon,
Eſpouuantant d’vn grand ſon
Et d’vn ſtile tel qu’il faut
Noſtre François eſchafaut :
Des grands Princes miſerables
Trainant en long les regrets
Par tonnerres execrables
Bruyans és tragiques Grecs.
» D’eſprit & d’art volontiers
» En tout differents nous ſommes :
» Ne deux ne quatre meſtiers
» Ne nourriſſent pas les hommes :
» Mais quiconque a le ſçauoir,
» Celuy doit l’honneur auoir.
O Baif, la plume pronte
A vouloir monter aux Cieux,
D’vn vol qui la Mort ſurmonte,
Trompe l’Enfer odieux.