Ronsard - Œuvres, Buon, 1587/En quel bois le plus
N quel bois le plus ſeparé
Du populaire, & en quel Antre
Prens-tu plaiſir de me guider,
O Muſe ma douce folie:
A fin qu'ardant de ta fureur,
Et du tout hors de moy ie chante
L'honneur de ce royal enfant
Qui doit commander à la France?
Ie cri'ray des vers non ſonnez
Du Grec ny du Latin Poëte,
Plus hautement que ſur le mont
Le Preſtre Thracien n'entonne
Le Cor à Bacchus dedié,
Ayant la poitrine remplie
D'vne trop vineuſe fureur.
Il me ſemble deſia que i'erre
Seul par les Antres, & qu'au fond
D'vne ſolitaire vallée
Ie chante les diuins honneurs
Du grand-pere & du pere enſemble.
Tandis Muſe ſur ſon berceau
Seme le Liz, ſeme la Roſe,
Seme la Palme & le Laurier,
L'honneur des veinqueurs és batailles
Ie preuoy qu'il vous aimera,
Et employra la meſme dextre
Dont guerrier il aura veincu
L'Eſpagnol & l'Anglois ſuperbe,
A polir des vers qui feront
Voler ſon nom par-ſus la terre,
Imitateur du grand Ceſar
Vaillant & ſçauant tout enſemble,
Qui le iour veſtoit le harnois,
Et en robbe eſcriuoit ſes geſtes.