Ronsard - Œuvres, Buon, 1587/Celuy qui ne nous honore
Eluy qui ne nous honore
Comme Prophetes des Dieux,
Plein d’vn orgueil odieux
Les Dieux il meſpriſe encore,
Et le Ciel qui nous decore
De ſon treſor le plus beau,
Nous mariant au troupeau
Que le ſainct Parnaſſe adore.
Vne ſainte ialouſie
De leurs preſens les plus dous
Se laiſſant gliſſer en nous
Flatte noſtre poëſie,
Qui darde la fantaſie
De leurs Preſtres agitez
Iusqu’au ſein des Deitez,
Yures de leur Ambroſie.
De-là reuolans au Monde
Comblez de ſecrets diuers,
Vont chantant par l’Vniuers
D’vne voix où Dieu abonde,
Et leur diuine faconde
Sert d’oracles, & ſont faits
Les miniſtres plus parfaits
De la Deité profonde.
Vn Démon les accompaigne
Par-ſur tous le mieux inſtruit,
Qui en ſonges toute nuit
Sans nul trauail les enſeigne,
Et demy-dieu ne deſdeigne
De les aller informant,
A fin que l’homme en dormant
Toutes ſciences appreigne.
Ils cognoiſſent la peinture
De ce grand Monde, & cela
Qu’il varie ça & là
En chaqu’vne creature :
Ore par leur eſcriture
Sont peſcheurs, ſont laboureurs,
Maçons, ſoudars, Empereus,
Vrais peintres de la Nature.
Celuy à qui le Ciel donne
Vn tel preſent, il peut bien
Dire à tous qu’il a le bien
Qu’à peu d’hommes il ordonne :
Et ſa langue qui doux ſonne,
Quand elle voudra chanter,
Braue ſe pourra vanter
Qu'elle eſt des Dieux la mignonne.
En chaque art iadis maint homme
Admirable s'eſt trouué,
Et admirable approuué
Par l'âge qui tout conſomme.
Quand aux Poëtes, on nomme
Vn Homere ſeulement:
Homere eternellement
Sur les autres ſe renomme.
Ce nous eſt experience
Que Dieu n'eſt pas liberal
A chaqu'vn en general
D'vne ſi belle ſcience,
Qui commença l'alliance
Bellay, qui fut entre nous,
Et qui loge par-ſur tous
En tes beaux vers ſa fiance.