Recueil général et complet des fabliaux des 13e et 14e siècles/XXVI
XXVI
D’UNE SEULE FAME
DE TOUS POINS.
n ung chastel sor mer estoient
Cent chevalier, qui là manoient,
Pour aus et le païs desfendre,
Par que nus ne les pouïst prendre.
Chascun jor assaut lor livroient
Sarrazin, qui Deu ne créoient.
Par acort furent treves mises
Entre les parties et prises,
Tant que chascun à lonc sejour
Retorna et fist son labour.
Li chastiax estoit biax et gens,
Mais assis estoit loing de gens ;
Deux fames entr’ax touz avoient,
Qui por aus buer les servoient ;
Assez estoient de bel atour.
Qui plus plus, qui miex, à son tour,
D’eles faisient lor volenté
Chascuns, et à cele plenté,
Et sà et là, ce est la somme,
Com fame puet miex servir home.
Ainsis furent par moult lonc tems,
Tant qu’entre aus orent .I. contens
Por les fames, ce m’èt avis ;
Car chascuns d’aus à son devis
Les vouloit avoir à son tour,
Sans faire as autres nul retour.
Quant les fames sorent la noise,
N’y a cele ne s’en envoise,
Car chascune en cuide bien faire
Son preu par li, et touz atraire ;
Chascune en ot au cuer grant joie,
D’ame furent com rat en moie.
Li plus sages se porpencerent,
Et ainsis le contens osterent,
Que chascune d’eles par rente
Serviroit Chevaliers cinquente,
Ne nus ne porroit[2] par justice
Faire à l’autre préjudice ;
Einsis cil et celes ansamble
S’acordèrent, si com moi samble[3].
Einsis furent bien longuement,
Tant qu’il avint, ne sai coment,
Que les treves furent rompues
Et les guerres sont revenues,
Et li assaus est revenus
Des Sarrazins et fort tenus,
Et li Chevalier dou chastel
S’adoubèrent et bien et bel,
Qui grant talent avient d’abatre
Les mescréans par bien combatre.
Yssu[4] sont fors à ost bennie
Toute la noble compeingnie,
Mais que .II. Chevalier, qui jurent
Au lit por ce que blecié furent.
Li uns avoit le col plaissié,
Et li autres le bras brisié ;
Esté avoient au tournoi
Où pris avoient ce bonoi.
Cilz au bras bien se contenoit ;
L’autres point ne se soustenoit,
Car dou mal l’esconvint mourir,
Et de cest siecle defenir.
Evous[5] le grant assaut repris
Contre nos Chevaliers de pris ;
Moult fu fors li abatéis
Des mescrens, et li feréis ;
Bien estoient .XV. millier,
Sarrasin, Persans et Escler[6].
Ainsis avint, que Dex le vot,
C’unne cité près d’anqi ot,
Où avoit Crestiens en treuage
Des Sarrasins et en servage,
Qu’oïrent dire la novèle
Que des Chrestïens la rouèle
Aloit à grant perdicion,
Se d’ax n’avient subvencion.
Il s’arment et aidier lor vont ;
Les Sarrasins desconfit ont ;
Tant chaplèrent et tant ferirent
Que les Sarrasins desconfirent ;
Chascuns en fu manans et riches,
Se il ne fu trop fox ou nices.
En la cité alèrent prendre
L’avoir, et les Sarrasins pendre,
Et près d’uit jors i sejornerent
Pour ce que moult travillié ierent.
De ciax-ci illuec vous lairai ;
Dou Chevalier blecié dirai
Qu’avoit héu le bras brisié ;
Forment l’en a au cuer pesé
Qu’il n’a esté en la bataille
Avecques les autres sens faille,
Car dou chastel vit vraiement
La fin et l’encommencement.
L’autre fame, non pas la soe,
S’en vint vers li, faisant la roe,
Et bien savoit de sa compeingne
Qu’ele estoit en autre besoingne ;
En decevant l’araisonna,
Et soutilment l’ocoisonna,
Com cele qu’ot mis s’estudie
Por qu’il féist de li s’ammie.
Tant fist cele, tant l’asproia
Que li Chevaliers la proia,
Et as mains la traist sor son lit
Et en vot faire son delit.
Cele li court[7] à la poistrine
Et sa face li esgratine,
Et li dist : « Chevalliers fallis,
Jà de moi n’arez vo delis,
Tant com vive la vostre amie.
En vos n’a loiautéz demie ;
Vos ne devez, bien dire l’ose,
Moi requerir de tele chose ;
Vos i avez vo sairement. »
Et cilz li respondit briément,
Qui fu souprins de ses paroles
Decevens, attraians et moles :
« Ou mourir t’esteut maintenent[8],
Ou faire mon commendement.
— Miex ain mourir, se morir doi,
Que por vos face tel desroi
Contre ceax à cui suiz donée,
Qui m’ont de lor amor douée ;
Jà non ferai, coment qu’il praingne ;
Vos le diriez à ma compaingne. »
Ainsis au Chevalier argue,
Dont la prent, et en lit la rue,
Et en vot faire son plaisir.
« De ce vos povez bien taisir,
Que jà à ce ne me menrois,
Que vo talent de moi façois,
Fait cele, se n’est en tel guise
Que ma compeingne soit occise,
Qu’en li n’a point de loiauté,
Ne je ne pris riens sa bonté. »
Tant l’a cele forment despite
Par les paroles qu’el a dite
Que li Chevaliers li otroie :
« Or faites dont que je le voie. »
Li Chevaliers va cele querre ;
Des quarniax la rue à terre,
Et cele chiet morte pasmée,
Come cele qui fu acourée.
Landemain si compaignon vindrent,
Et lor parlement à li tindrent,
Où lor soingnans alée estoit.
Cil lor respont qu’il ne savoit.
Tant la quistrent et tant alèrent
Qu’an fossez morte la trovèrent,
Dont li demandent l’occoison
Por coi morut, par tel raison.
Li Chevaliers conté lor a
Coment la fame l’argua,
A faire einsis l’occision ;
Le fait et la narracion
Lor a conté, ce est la somme.
Li Chevalier furent prodome ;
Lor compaignon pas ne tuerent.
Adonc la fame entr’ax hucherent
Pour qu’avoit fait tel murtre faire
Et sa compeingne einsis desfaire.
Cele respont : « Jel vos dirai,
Que jà d’un mot n’en mentirai.
Dou deul de ma compeingne avoie,
Pour ce c’on li faisoit plus joie
Qu’à moi, si com il me sembloit,
Et de vos miex amée estoit.
Pour soupeçon de jalousie,
Par hayne traicte d’envie,
Pour ce la haïoie si forment,
Qu’il ne me chaut de quel torment
Desormais morir me faciez.
Mais, se respitier me voliez,
Ce que nous .II. fere souliens
Feroie ; jà n’en faudroit riens. »
Li Chevalier l’ont respitie
Que ne fu pas à mort jugie.
Molt se pena d’aux bien servir,
Par que lor gré puit desservir.
Tant fist qu’aussi bien les servoit
Com lors quant deuz en y avoit,
Ne ne se vont aparcevant
De desfaut nul ne que devant.
Einsis fust par ceste aventure
Délivrée de mort obscure ;
Des Chevaliers fu si privée
Que ses services lor agrée ;
Onc ne recrut de lor amor,
Ne tost, ne tart, ne nuit ne jor,
Ains lor livroit assez estor,
Car chascuns l’avoit à son tor.
- ↑ XXVI. — D’une seule fame qui servoit .c. chevaliers
de tous poins, p. 294.Publié par Barbazan, I, 98 ; par Méon, III, 61-67 ; et donné en très-court extrait par Legrand d’Aussy, III, 339-340.
- ↑ Vers 37 — pourroit, lisez porroit.
- ↑ 40 — semble, lisez samble.
- ↑ 51 — Yssus, lisez Yssu.
- ↑ 63 — Es-vous, lisez Evous.
- ↑ 68 — Les Sarrasins, les Persans, les Slaves (Cf. Romania, II, 331) sont indistinctement des païens aux yeux des hommes du moyen âge.
- ↑ 107 — cort, lisez court.
- ↑ 119 — maintenant, lisez maintenent.