Recueil général et complet des fabliaux des 13e et 14e siècles/CXXV

Du Prestre qui ot mere a force

Anonyme

Du Prestre qui ot mere à force

Recueil général et complet des fabliaux des XIII^e et XIV^e siècles, Texte établi par Anatole de Montaiglon et Gaston Raynaud, Librairie des Bibliophiles, 1883, Tome V (p. 143-150).

CXXV

DU PRESTRE

QUI OT MERE A FORCE

Paris, Bibl. nat., Mss. fr. 837, fol. 229 v^o à 230 v^o,
et 19152, fol. 57 r^o à 58 r^o.^[1]

1
Icis fabliaus, ce est la voire,
Si nous raconte d’un provoire
Qui avoit une vielle mere
Mout felonesse et mout amere ;
5Boçue estoit, laide et^[2] hideuse,
Et de toz biens contralieuse.
Toz li mons l’avoit contre cuer,
Le prestres meïsme à nul fuer
Ne vousist^[3] por sa desreson
10Qu’ele entrast ja en^[4] sa meson,
Trop ert parliere et^[5] de put estre.
Une bele amie ot^[6] le prestre,
Que il vestoit et bien et bel :
Bone cote ot et bon mantel,
15S’ot .II.^[7] peliçons bons et biaus,
L’un d’escuireus, l’autre d’aigniaus ;
Et s’ot^[8] riche toissu d’argent,
Dont assez parloient^[9] la gent.

Mais la vielle^[10] parole plus
20De l’amie au prestre que nus,
Et disoit^[11] à son fil meïsme
Que il ne l’amoit^[12] pas la disme
Qu’il fet s’amie ; il i pert bien
Que li^[13] ne veut il doner rien,
25Sorcot, ne peliçon, ne cote :^[14]
« Tesiez, » fet il, « vous estes sote ;
De qoi me fetes^[15] vous dangier,
Se du pain avez à mangier,
De mon potage et de mes pois ?
30Encor est ce tout^[16] seur mon pois,
Que vous m’avez fet mainte^[17] honte. »
La vielle dist, que rien ne^[18] monte :
« Desormès voudrai^[19] en avant,
Que vous me tenez par couvant
35A grant honor^[20] com vostre mere. »
Li prestres respont^[21] : « Par saint Père,
Fetes du pis que vous porrez :
Jamès du mien ne mengerez
Ne ne girrez en ma meson.
40— Si ferai voir. — Non ferez. — Non ? »
Fet la vielle^[22], « je m’en irai
A l’evesque ; se li dirai^[23]
Vostre errement et vostre vie,
Com vostre meschine est servie.
45— Alez vous en, » ce dist le prestre :^[24]
« Trop estes male et de put estre,
Ne venez jamais ceste part. »^[25]
Atant la vielle s’en depart^[26]

Tout ausi^[27] comme forsenée.
50Droit à l’evesque en est alée ;
Au pié li chiet, et si se claime
De son fil qui gueres ne^[28] l’aime,
Ne ne li veut faire nul bien^[29]
Ne plus qu’il^[30] feroit à .I. chien.
55Tout son cuer^[31] met à sa meschine :
Il n’a cure d’autre voisine ;^[32]
Cele a tout à sa volenté.^[33]
Et quant la vielle a tout conté^[34]
A l’evesque ce qu’ele volt^[35],
60Il li respont au premier mot^[36]
Qu’il ne se voist mie repondre ;^[37]
Que il fera son fil semondre^[38],
Qu’il viegne^[39] à cort à jor nomé.
Et la vielle l’a^[40] encliné :
65Si^[41] s’en part sanz autre responsse,
Et l’evesque fait sa^[42] semonsse
Sor le prestre qu’il^[43] viegne à cort,
Que mout le voudra tenir^[44] cort ;
S’il ne fet reson à sa mere,
70Je dout mout qu’il ne le^[45] compere.
Li tens^[46] s’en vait et li jors vint
Que li^[47] evesques ses plais tint ;
Mout i ot clers et autres gens,
Et de provoires bien deus cens.^[48]
75La vielle ne s’est pas tenue :
Droit à l’evesque est revenue,^[49]
Et li ramentoit sa besoingne.
L’evesque dit que ne^[50] s’esloingne,

Que si tost^[51] com son filz vendra
80Sache que il^[52] le souspendra,
Et li toudra^[53] son benefice.
La vielle qui fu fole et nice,
Quant ele ot parler du^[54] souspendre,
Cuida c’on deüst son filz pendre,^[55]
85Puis dist à soi^[56] : « Maleürée,
Porqoi me sui à lui clamée ?
Deables furent à mon nestre,
Quant mon chier filz penduz doit estre,
Que je portai dedenz mes flans. »
90Toz li est esmeüs li sans ;
Grant piece estut^[57] comme esbahie.
Lors s’apenssa, la renoïe,
Qu’à l’evesque fera acroire^[58]
C’ert son filz d’un autre provoire.
95Atant uns prestres leanz entre,
Qui mout fu gros par mi le ventre ;^[59]
Si ot le col roont et cras.^[60]
La vielle dist^[61] isnel le pas
A l’evesque, et^[62] cria en haut :
100« Sire, sire^[63], se Dieus me saut,
Mes filz est cil^[64] gros prestres là. »
L’evesque tantost^[65] l’apela :
« Venez ça^[66], prestres desvoiez :
Dites moi porcoi renoiez
105Vostre mere que je voi ci^[67] ;
Se Dieus ait de m’ame merci,
A poi que je ne vous souspent.
La bone fame à vous s’atent,

Qui est mout povre et mout frarine,^[68]
110Et vous vestez vostre^[69] meschine
De bone^[70] robe vaire et grise :
Com par est ore bien^[71] assise
La rente dont estes^[72] saisis ! »
Li prestres fu toz esbahis
115De ce que l’evesque li dist^[73] :
« Sire, » fet il, « se Dieus m’ait,
Je n’oi mere mout a lonc tens,
Je ne cuit mie, ne ne pens^[74]
C’onques^[75] ceste vielle veïsse.
120Sachiez que pas nel desdeïsse,^[76]
Se cuidaisse que fust^[77] ma mere.
— Qoi ! » fet l’evesque, « par saint Pere,
Or estes vos trop desloiaus,^[78]
Et trop malvais prestres et faus :
125Vous estes escommeniez^[79]
Quant vostre mere renoiez :^[80]
Et souspendus ne puet autre^[81] estre. »
Dont ot^[82] mout grant paor le prestre :
Quant il ot^[83] qu’il ert souspenduz
130Mout fu dolenz et esperduz ;^[84]
A l’evesque merci cria,
Et dist que son plesir fera.
Dit l’evesques : « Et je^[85] l’otroi.
Or prenez vostre palefroi ;
135Si metez^[86] vostre mere sus,
Et gardez que n’en^[87] oie plus
Novele plainte^[88] ne clamor,
Mès portez li mout^[89] grant honor :

Si la vestez si qu’il i paire^[90]. »
140Atant li prestres^[91] s’en repaire ;
Quant de l’evesque ot le congié,^[92]
Tart li est qu’il fust^[93] eslongié.
La vielle porte devant soi
Sor le col de son palefroi,
145Et maugré sien, ce sai de voir,
Li trovera son estovoir.
Encor n’ot^[94] une liue alée,
Quant il, ou fons d’une^[95] valée,
Le fil à la vielle encontra.
150Cele part son chemin torna^[96],
Des noveles le tint mout cort ;
Et cil li dist que à la cort
Devant l’evesque .I. jor^[97] avoit.
Don regarde sa mere et voit,^[98]
155Qui li fet signe^[99] c’outre alast,
Et que de rien ne l’aparlast ;^[100]
Et quant il fu^[101] outrepassez,
Li autres prestres dist : « Alez,^[102]
Quant vendrez à cort, biau compaing,
160Dieus vous doinst autretel^[103] gaaing
Com je ai fet ceste vesprée ;^[104]
L’evesque m’a mere donée :
Ou soit à droit, ou soit à tort,
Ceste vielle hideuse en port,
165Si la me covient maintenir. »
Adonc ne se pot plus^[105] tenir
Li filz à la vielle de rire.
Lors commença au prestre à dire :^[106]

« Se vous vostre mere en portez,
170Por ce ne vous^[107] desconfortez.
— Mere ! sire, » ce dist^[108] le prestre,
« Mere, au deable puist ele estre,
Que^[109] ma mere ne fu ele onques ! »
L’autre prestres li dist adonques^[110]
175De chief en chief sa volenté :^[111]
« Qui or vous feroit tel bonté,
Que la vielle por vous preïst^[112]
Et la peüst et la vestist,^[113]
Tote sa vie l’i trouvast,^[114]
180Mais que la vielle l’otroiast,
Que li donnez vous, biaus douz sire ? »
Li prestres respont^[115] : « Par saint Sire,
Cui hom je sui^[116] et chapelains,
S’il estoit ne clers^[117] ne vilains,
185Qui de son cors me delivrast,
Et la vestit et la chauçast,^[118]
Il en avroit .XL.^[119] livres.
— Por tant en serez vous delivres, »
Fet il, « se vos les me bailliez,^[120]
190N’aiez garde que i failliez. »
Fet cil^[121] : « Se la vielle l’otroie. »
Fet la vieille : « Se Dieus me voie,
Je l’otrie mout^[122] bonement. »
Lors a cil fet^[123] le paiement
195Et les deniers creante^[124] à rendre.
Or puet plus asseür despendre
Li filz à la vielle sanz faille
Que^[125] cil toz les deniers li baille

Si s’en acuité^[126] com loiaus.
200A cest mot fenist cis fabliaus^[127]
Que nous avons en rime mis
Por conter devant noz amis.

Explicit du Prestre qui ot mere à force.

---

1. CXXV. — Du Prestre qui ot mere a force, p. 143.

   A. — Paris, Bibl. nat., Mss. fr. 837, fol. 229 v^o à 230 v^o.

   B. — Paris,» Bibl. nat.,» Mss. fr.» 19152, fol. 57 r^o à 58 r^o.

   
   

   Le ms. B porte ce titre : « Du Prestre qui ot mere malgré sien. »

   
   

   Publié par Barbazan, II, 47, et par Méon, III, 190-196, et traduit par Legrand d’Aussy, III, 117-121, sous le titre « Du curé qui eut une mère malgré lui. »

   
   
2. Vers 5 — B, noire et.
3. 9 — B, Ne voloit.
4. 10 — B, Que ele entrast en.
5. 11 — B, cuiverte et.
6. 12 — B, Or ot une amie.
7. 15 — B, Et .II.
8. 17 — B, Si ot.
9. 18 — B, Assez en parole.
10. 19 — B, vielle en.
11. 21 — B, Si a dit.
12. 22 — B, l’aime.
13. 24 — B, A lui.
14. 25 — B, Ne bon mantel ne bone cote.
15. 27 — B, menez.
16. 30 — B, Encor le fai ge.
17. 31 — B, dit mainte.
18. 32 — B, ne vos.
19. 33 — B, Quar ge vorrai d’or.
20. 35 — B, D’or en avant.
21. 36 — B, a dit. — Les quatre vers suivants sont remplacés dans B :

    Jamais du sien ne mengera ;
    Or face au mielz qu’ele porra
    Ou au pis tant que il li loist.
    — Si ferai, mais que bien vos poist…

22. 41 — B, Fait ele, quar.
23. 42 — B, le conterai.
24. 45-46 — Ces deux vers sont remplacés dans B :

    Assez a à mengier et robes,
    Et moi volez paistre de lobes.

25. 47 — B, De vostre avoir n’ai nule part.
26. 48 — B, A itant… s’en part.
27. 49 — B, Autresi.
28. 52 — B, noient ne.
29. 53 — B, Si ne li fait honeur ne bien.
30. 54 — B, Ne que il.
31. 55 — B, De tot en tot.
32. 56 — B, Qu’il aime plus que sa cousine.
33. 57 — B, Cele a des robes à plenté.
34. 58 — B, Quant… aconté.
35. 59 — B, que lui plot.
36. 60 — B, à .I. seul mot.
37. 61 — Ce vers est remplacé dans B par un autre placé après le v. 62 :

    Atant ne li volt plus respondre.

38. 62 — * semondre. A, repondre.
39. 63 — B, Ainz vint.
40. 64 — B, La… l’en a.
41. 65 — B, Puis.
42. 66 — B, fist la.
43. 67 — B, A son fill que il.
44. 68 — B, Qu’il le voira tenir si.
45. 70 — B, Ge crieng que mout chier.
46. 71 — B, Quant li termes.
47. 72 — B, Et li.
48. 74 — B, Et provoires plus de .II. cens.
49. 76 — B, A l’evesque en est venue (faux).
50. 78 — B, pas ne.
51. 79 — B, Que tantost.
52. 80 — B, Bien sache qu’il.
53. 81 — B, Et toudra tot.
54. 83 — du. B, de.
55. 84 — B, Crient que son filz ne face pendre.
56. 85 — B, Lors dist en bas.
57. 91 — B, Et durement fu.
58. 93 — B, Qu’ele fera l’evesque acroire.
59. 96 — B, En l’ostel, qui savoit le ventre.
60. 97 — B, Le col reont et gros et gras.
61. 98 — B, Tantost la vielle.
62. 99 — B, « et » manque à B.
63. 100 — B, Sire, » fist el(e).
64. 101 — B, C’est mes filz cist.
65. 102 — B, Tantost l’evesque.
66. 103 — B, Si li dist.
67. 105 — B, qui est ici.
68. 109 — B, Que vos tenez povre et frarine.
69. 110 — B, tenez vostre.
70. 111 — B, A bone.
71. 112 — B, Mout est or bien la rente.
72. 113 — B, Dont estes tenanz et.
73. 115 — B, li evesques dit.
74. 118 — B, Ne ge ne cuit mie ne pens.
75. 119 — B, Que mais.
76. 120 — B, Bien sachiez ne vos en mentisse.
77. 121 — B, Foi que doi vous, se fust.
78. 123 — Ce vers et le suivant manquent dans A.
79. 125 — B, Qui vostre mere renoiez.
80. 126 — B, Vos seroiz escommeniez.
81. 127 — autre. B, el.
82. 128 — B, Or ot.
83. 129 — ot. B, sost.
84. 130 — B, Toz li sans li est esmeüz.
85. 133 — B, Et dit li vesques : « Ge.
86. 135 — B, Si montez.
87. 136 — B, Gardez que ge n’en.
88. 137 — B, Parole.
89. 138 — B, Ainz la tenez à.
90. 139 — B, Con vostre mere.
91. 140 — B, Li prestres tantost.
92. 141 — B, Con li fu donez li tongiez.
93. 142 — B, qu’il soit. — Les quatre vers suivants manquent dans A.
94. 147 — B, Ainz qu’il ait.
95. 148 — B, En mi le.
96. 150 — B, le chemin entra.
97. 153 — B, .I. plait.
98. 154 — B, Lors regarde, sa mere voit.
99. 155 — B, li cligne.
100. 156 — B, De mile riens ne l’arainast.
101. 157 — B, Et il s’en est.
102. 158 — B, L’autre prestre li dit assez.
103. 160 — B, i doint autel.
104. 161 — B, Con j’a[i] fait ceste matinée.
105. 166 — B, Lors ne se pot mie.
106. 168 — B, Si li a dit : « Beaus trés dolz sire.
107. 170 — B, Ja ne vos en.
108. 171 — B, Moie deables, » fait.
109. 173 — B, Quar.
110. 174 — B, Lors li dist l’autre prestre donques.
111. 175 — B, Par foi, merveilles me contez.
112. 177 — B, Qui por vos la mere peüst.
113. 178 — B, Et livrast que li esteüst.
114. 179 — Ce vers et le suivant manquent dans A.
115. 182 — A, Quoi ? » fet l’evesque.
116. 183 — B, Qui ge sui hons.
117. 184 — B, Ja n’en ere fous.
118. 186 — B, Si que la vielle l’otroiast.
119. 187 — B, Ge li dourrai .LX.
120. 189 — Ce vers et le suivant manquent dans A.
121. 191 — il. B, cil
122. 193 — B, Et ge l’otroie.
123. 194 — B, Lors fiancent.
124. 195 — B, A terme et les deniers.
125. 198 — B, Quar.
126. 199 — B, Il s’aquila. — A, comme.
127. 200 — B, A icest mot falt li flabeaus. — Les deux vers suivants manquent à B.
     
     

     Cette histoire, versifiée par Imbert, a été reprise par le comte de Chevigné dans ses Contes rémois.