Imprimé. — Mercure de France, année 1766, février, page 36.
Imprimé. — Lettres de Henri IV, etc. publiées par N. L. P. Paris, 1814, in-12, p. 88.
Monsr de Lardimalie, J’ay entendu par le sr de la Valade les bons offices dont vous avez usé en la negociation d’Agen, et comme vous estes en train d’en faire aultant d’ailleurs, si vous pouvez ; chose qui me seroit fort agreable, et que je vous prie vouloir embrasser de telle affection, que bientost on puisse voir quelques bonnes fins, et je vous asseure que je n’en demeureray point ingrat. Quant au dict faict d’Agen, si l’on m’avoit donné esperance de plus qu’il n’est porté par l’offre, je ne sçais comment on s’arreste à present. Il est bien vray que je me fie que les principaulx y ayant interest, estant ensemble, ils s’avanceront à ce que j’en ay esperé, comme le dict de la Valade vous fera entendre, à quoy je vous prie tenir la main, et vous cognoistrez que je ne vous oublieray point, les affaires ayant reussi. Sur ce, je vous prieray de faire estat de ma bonne volonté, comme aussy je prie Dieu vous tenir, Monsr de Lardimalie, en sa saincte et digne garde.
Du Mont de Marsan, le xxixe novembre 1583.