Cop. – B. R. Fonds Leydet. Mém. mss. sur Geoffroy de Vivans, p. 82.
Monsr de Vivans, Puisqu’il n’a pas tenu à moy, ni à ceulx qui m’ont assisté à l’entrevue de mon cousin le mareschal de Montmorency, que nous n’ayons faict quelque chose de bon pour l’establissement de la paix et repos des subjects du Roy mon seigneur, j’en ay ma conscience deschargée. Mais je ne laisse pas pourtant de considerer les maux qui semblent se preparer sur les ungs et sur les aultres ; et affin que l’orage ne tombe ez endroicts de mon gouvernement d’où je suis esloigné, j’ay advisé de m’y acheminer et envoyer mon cousin monsr le vicomte de Turenne vers le haut Languedoc[1], pour y faire contenir toutes choses en un paisible estat, et pourveoir de telle façon à ce qu’il jugera estre besoing, qu’il ne s’y puisse rien alterer cy-aprés ; vous priant tenir la main de vostre costé qu’on se conduise prudemment en vos quartiers sans rien esmouvoir, et m’advertir à toute heure de la disposition des affaires ; prenant garde surtout qu’on ne vous puisse imputer d’estre des premiers remuans. Et sur ce je prie, etc.
De… ce 20 janvier 1580.
[2] J’espere estre à Nerac le 24 de ce mois, et je vous prie me venir treuver, car j’ay extremement affaire de vous parler.