Orig. autographe. – Arch. secrètes du Vatican. Copie de M. le comte Marini, archiviste de la Sainte Église Romaine. Envoi de M. l’ambassadeur de France à Rome.
Tres sainct Pere, Ayant par cy-devant desliberé, ainsi que nous en avons desjà adverty Vostre Saincteté, d’envoyer de nostre part quelque notable personaige devers icelle, pour luy rendre en mon nom l’obeissance et soubmission que comme trez humble et devot fils nous luy devons et au Sainct Siege apostolique, et cogneu par les lettres qu’il luy a pleu nous escrire, du premier de novembre dernier, dans les sainctes et vertueuses admonestations qui y sont contenues, de quelle grande et singuliere dilection et charité paternelle elle nous vouloit recueillir et embrasser, nous n’avons peu plus longuement retarder la desclaration que nous sentions estre tenus solemnellement rendre de ceste nostre soubmission et devote obeissance, tant pour l’acquit de nostre debvoir, que l’edification de tous les princes et peuples chrestiens et catholiques. Qui est cause que nous envoyons devers Vostre Saincteté nostre amé et feal le sr de Duras, l’un de nos chamberlans ordinaires, gentilhomme de nom et de qualité, et des plus proches que nous tenons à l’entour de nostre personne, pour luy faire et rendre au Sainct Siege apostolique publiquement et solemnellement les debvoirs de soubmission et obeissance pareille à celle que nos predecesseurs Roys luy ont rendue de nos Royaumes et pays et terres de nostre souveraine obeissance[1]. Sur quoy nous supplions tres humblement Vostre Saincteté le vouloir en nostre nom recevoir, et, selon l’entiere et parfaicte confiance que nous avons d’elle, nous conformer à ce que Vostre Saincteté cognoist appartenir à la reputation de sa paternelle equité et à nostre dignité ; et au surplus donner la mesme foy et creance à ce que ledict sr de Duras luy dira et exposera de nostre part, comme elle feroit à nostre propre personne. Et nous prions en cest endroict Dieu,
Tres sainct Pere, vouloir conserver et maintenir Vostre Saincteté, par beaucoup d’heureuses et longues années, au bon regime et gouvernement de son Eglise. Escripte à Paris, ce xviije jour de decembre 1573.
HENRY.
- ↑ Cet hommage était annoncé dans les lettres de soumission écrites l’année précédente, et envoyées de même par M. de Duras. (Voy. lettre du 3 octobre 1572. Ire.)