De hayne et de felonnie,
Moult a en poi d’eure honnie
La gent qui souz lui maint et marche.
Si con tu vois qu’en ceste marche
Riens ne demeure où la riviere
Se puist estendre, en tel manière
Est la gent destruite et gastée
Par mauvais prince et tampestée
Et tournée à confusion.
Et la droite devision
De ces nés que tu vois perir
Seur ces grans isles et ferir
A ces roches d’yaue couvertes,
Freres, ce sont les granz povertes,
Les grans tourmens et li meschiés
D’enfer, où cil sont trebuschiés
Qui trop en tel seigneur se fient ;
Quar riens nulle ne contredient
Qu’il li voient faire ou emprendre ;
Tout li sueffrent, sanz lui reprendre.
Quanqu’il veult faire ou achever,
N’osent point à lui estriver
Recheveur, baillif ne prevos :
Nuls d’iaus n’a tant le cuer devos
Qu’il contredient riens qu’il veulle ;
Jà soit ce que raisons s’en dueille
Et que nus drois ne s’i asente ;
Chascuns suit sa trace et sa sente ;
Tout mal faire li enheudissent
Et enortent, puis se perissent
Ou malice et ès grans forfais
Qu’il ont ou nombre de lui fais.
S’avient ainssi d’eus, c’est sanz doute,
- ↑ d’iaus omis.