N’eüst tantost desrachiné,
Esrachié et tost affiné,
Ne riens entour lui ne duroit.
Moulins et estans desmuroit,
Courtilz, jardins et arbrissiaus ;
Basses rivieres et ruissiaus
Aünoit et engloutoit toutes.
Tant ot de manieres estoutes
Pour le pays adomagier,
Qu’à paine y pooit on nagier,
Tant fust li tans clers ne seris,
Qu’en l’eure ne fussent peris,
Se par fortune n’eschapoient ;
Car en petit d’eure exsipoient
Les nés et tournoient à perte ;
Seur une isle d’yaue couverte
Brisoient, ou saur une roche ;
Plus tost c’uns quarriaus ne descoche,
Perissoient sanz nul secours.
Moult estoit perilleus ses cours
Tant qu’elle ainssi se tampestoit,
Car nulz asseür n’i estoit,
Ainz faisait moult à redouter.
Lors m’alai tantost acouter
Delez Verité pour savoir
De tout ce l’example et le voir,
A quelle fin ce devoit tendre,
Car moult estoie de l’entendre
Couvoiteus et très desirans.
— « Freres, c’est li princes tirans »,
Dist Veritez, « qui adès tire
N’à nul bon arroy ne satire ;
Page:Watriquet de Couvin - Dits, édition Scheler, 1868.djvu/295
Cette page a été validée par deux contributeurs.
