Car li aigniaus ot abatu
Le lyon ou champ desouz lui,
Dont merveilles esbahis fui
Et pensai mout, ce vous afin,
Comment à outrance et à fin
Cis aigniaus le lyon metoit
Et seur sa pance li montoit
A. ij. piez, et pour estrangler
L’avoit fait en terre enangler
S’esgardai d’eus moult longuement
La bataille et l’ordenement,
Mais touz dis en avoit le pis
Li lyons, car droit seur son pis
Li estoit li aigniaus montez.
Lors priai que m’en fust contez
A verité touz li affaires,
Li moustres et li examplaires,
Comment c’estoit et par quel guise
Celle grant beste iert à fin mise
Ensement par celle petite.
— « Dame, pour Dieu, qu’il m’en soit dite
Veritez, grant merveille en ai ;
A bonne heure à vous assenai,
Car moult y ai de bien apris.
A ces mos Veritez m’a pris
Par la main et puis me dist : « Freres,
De ce fait est biaus li misteres
Assez plus c’on ne porroit dire,
Si n’est pas folz cilz qui s’i mire
Et qui à droit i veult penser.
Ainssi set Diex de mort tenser
Les siens au besoing, et aidier
Mielz qu’il ne sèvent souhaidier
De leur besoignes s’entremet,
Et cis qui de cuer paine i met,
Page:Watriquet de Couvin - Dits, édition Scheler, 1868.djvu/289
Cette page a été validée par deux contributeurs.
