De ceus qui sus sont et demeurent,
Pour ce que leur temps i labeurent
Seur fondement que ne vaut riens
Et dont pourriz est li mairriens ;
C’est uns perilz trop merveilleus.
De ce pont, qui si perilleus
Est à estre et à converser
Qu’il semble adès qu’il doit verser,
Le mistere t’esponderai,
Et bien dire à touz l’oserai
Que c’est li mondes vraiement,
Où li uns reverse ensement
Devant l’autre à mort et trespasse
Sans respasser, en poi d’espasse.
Moult est du cors la vie briés,
Et l’ame sent les encombriés
De ses grans pechiez et la paine
En teniebres où on l’en maine
Par celle eve hideuse et rade.
Nonpourquant, haitié ne malade,
A paines nus ne s’en chastie,
Ainz a chascuns maison bastie
Où plus peril et meschief voient.
Il semble que il se desvoient
A escient ; adès i cuident
Demorer, ne point ne se wident
D’estat de pechié ne de vice.
Pluseur n’ont amour ne service
Fors au monde, c’est chose aperte,
Et si ne leur tourne qu’à perte :
Tout perdent de quanqu’il i metent,
Tu le vois, cil qui s’entremetent
De faire sour ce pont maison,
Page:Watriquet de Couvin - Dits, édition Scheler, 1868.djvu/280
Cette page a été validée par deux contributeurs.
