Ensus, quant trop l’oi aprochié,
Et ai tantost harou huchié,
Et pris à trembler de paour.
— « Compains, Dieu et ses sains aour »,
Dist Veritez, « et que te faut ?
Or me di, se Diex te consaut,
Fai moi veritable respons :
T’a or bien esbahi cis pons,
En es tu bien esmerveilliez ? »
— « Dame, oïl voir, or me veuillez
Dire pour Dieu que ce puet estre.
Ce pont à destre et à senestre
Voi de pierre si bien pavé
Et si richement atravé
De maisons, chastiaus et dongons —
Montferrant que nous eslongons
Ne fu onques si biaus d’assez —
Que tiex .xx. en a amassez
Et fais seur ce pont touz en route,
Et si voi que chascune est route
Des estaches qui le soustiennent :
Je ne sai comment il s’i tiennent
Ne comment nus manoir y ose,
Car c’est trop perilleuse chose.
Il semble adès qu’il doit cheoir,
Vous le povez à l’ueil veoir ;
Aussi font il chascuns l’esgarde,
Mais il ne s’en donront de garde
Qu’il leur charra tout en .i. mont.
Et quant paours ne les semont
De ce pont perilleus widier,
Page:Watriquet de Couvin - Dits, édition Scheler, 1868.djvu/278
Cette page a été validée par deux contributeurs.