« Fier, fier, ochi, ochi, ochi ! »
Li mauvis respont : — « Vez le chi
Oprimes le temps qui m’agrée
Et la saison plus desirée
D’amie et de loial ami. »
Je ne sai d’autrui, mais à mi
Semble de l’ostel et de l’estre
Ce soit fins paradis terrestre,
Tant est de melodie plains.
Li cochevis amoureus plains
Et souspirs va souvent nonchant
Devant sa femele. En son chant
De douz langage, à haute alaine
Crie : — « Or sui hors de la vilaine
Saison froide laide d’yver
Qu’en terre muerent tout li ver.
Ainssi se deduit et envoise ;
Et puis i refont si grant noise
Cil autres oiselés menus,
Qu’il n’est hons jœnes ne chanus
Grant deduit n’i poïst avoir,
Et bien i paie son devoir
Li chardonnereuls, bien s’i vent
De chanter menu et souvent,
Le col tendu, le bec as nues.
Les mesenges n’i sont pas mues,
Les losturgnes ne li pinchons,
Ainz chantent seur les espinchons
Et seur les branches jour et nuit ;
N’est nus qui tiex deduis anuit,
S’il a de Dieu amer envie,
Puis qu’il li donne espace et vie
Page:Watriquet de Couvin - Dits, édition Scheler, 1868.djvu/263
Cette page a été validée par deux contributeurs.
