roy et des barons, et de la volenté de ceus de Navare qui le requirent et voloient, que le droit du royaume de Navare appartenoit à la contesse d’Esvreus. Et par ainssinc, le conte d’Esvreus fu rois de Navarre par cause de sa fame, fille jadis du roy Lois, premier filz du roy Philippe le Bel, et se clama par la grâce de Dieu roy de Navarre, etc.
En cel an, fu grant appareil fait pour la coronacion Philippe de Valois roy de France, lequel fu sacrez à Rains, le jour de la Trinité, de l’evesque Guillaume de Trie. Et là furent tant de haus hommes assemblés qu’il n’est pas memoire que tant d’assez en eust esté en coronacion de roy de France ; et dura la feste v jours en joustez, en esbatemens si grans que c’estoit merveille à ce veoir. Et avec li fu couronnée la roine sa fame qui suer estoit du duc de Bourgoigne.
En cel meisme an, de ce que le royaume avint à Philippe de Valois, pluseur complaintez vindrent aus oreilles du nouviau roy encontre i bourjois qui avoit esté mestre tresorier du roy Karle son predecessour ; et comment il avoit fait par le royaume la chierté en toutez denrées, et mesmement par les foirez de Champaigne, et comment il avoit receu les gages des povres gentix hommes qui le roy avoient servi en sez guerres et à soi les retenoit ; et s’aucune chose en paoit, il prenoit des creditourz lettres de quittance du tout et leur en paoit le tiers ou le quart de leurs debtes. Dont pluseurs cas de crisme ainssinc raportés au roy de celui tresorier qui nommés estoit Pierre Remy, il fu arestez et pris, et menez en Chastelet. Mès sus ces crismes que l’en li opposoit, il ne disoit autre chose més, que ce que fait avoit il avoit fait du gré du roy ; laquelle chose il ne pout monstrer. Et pour ce, veu et considéré que les crismez opposez furent prouvés, combien que la royne Jehanne d’Esvreus eust requis le roy Philippe, que pour l’amour du roy Karle,
