sist envoier ayde. Si leur envoia le seigneur de Craon[1] et messire Ayton Daurie[2], et aveques eulz grant compaignie et fort. Quant il furent venuz en Bretaigne et avesques les Bretons adjoins, si se partirent à i mardi, et environ heure de tierce il assaillirent la ville de la Roche Deryan très vertueusement et continuelment depuis ledit mardi jusques au jeudi. Mais ceulz de la ville se deffendoient forment, et gittoient bois et genestes ardanz et poignies de blé sanz batre ardanz, et si gittoient poiz et autres cresses boulanz, et se deffendoient par toutes les manieres qu’il pooient. Quant il virent que bonnement il ne se pourroient plus deffendre encontre ceulz qui là estoient, il se consentirent à rendre la ville, saufz leurs corps et leurs biens. Si furent d’un acort, les François et les Bretons, qu’il n’aroient congié de la vie ne de issir hors. Si commencierent derechief les noz à assaillir et ne laschierent jusques à l’endemain continuelment qui fu jour du vendredi. Et en yceli vendredi, le seigneur de Craon mist en une petite bourse l escuz d’or et la pendi à un grelle baston lonc, et le tenoit en sa main. Si commença à dire à ceulz qui assailloient la ville : « Qui premier enterra en la ville, en verité, il aura ceste bourse aveques les flourins. » Quant les Genevois virent celle bourse, ilz commencierent à assaillir la ville plus fort que par avant et pristrent maulz de fer qui avoient longues pointes et grosses testes, lesquiex mailz sont appeliez testuz. Si distrent les uns aux autres, « v de nous yrons au mur atout noz martiaux, et vous serez devant
Page:Viard - Grandes chroniques de France - Tome 9.djvu/335
Le texte de cette page a été corrigé et est conforme au fac-similé.
