Page:Viard - Grandes chroniques de France - Tome 9.djvu/266

bourgois et le commun si porterent ceste chose moult griefment et disoient que les marchiez de vivres en seroient moult amenuisiez et empeschiez. Si convindrent touz de fait d’un acort à proceder en l’office du roy et de tout le conseil par telle maniere. Car de fait il vindrent au fleuve de Loire, là où estoient aucunes nefs plaines de vivres pour estre menées au duc de Bourgoigne et en son dit pays, lesquelles, sanz aucune discrecion et sanz arroy mistrent touz lesdis vivres en vente toute commune à touz ceulz qui avoir en vouloient. Et adecertes aucuns d’yceulz s’en decouroient par la ville et par les forbours et par les villes voisines, et rompoient les huis et exposoient les biens des povres à larrecin. Quant le prevost d’Orliens vit ce, si considera que de legier il ne pourroit pas obvier à si grans forseneries, toutevoies il fist ce qu’il pot, car par ses sergens, il fist prendre xii ou xiii des malfaiteurs et les fist mettre en prisons diverses. Quant les autres de la ville oyrent dire que le prevost en avoit mis aucuns en prison, si s’esmurent aussi comme hors du sens et forsenez, et s’en alerent aus prisons et les rompirent et mistrent hors ceulz que le prevost y avoit mis. Et non pas seulement ceulz mais touz autres prisoniers, et meismement aucuns qui estoient condampnez à mort pour leurs meffais. Quant ces choses furent venues à la cognoissance du roy, il envoia là ii chevaliers, et aveques eulz grant quantité de gens d’armes, et leur commanda bien acertes que tous ceulz qu’il trouveroient coupables de ceste dissencion, que tantost et sanz delay il les feissent pendre, et meismement ceulz que le prevost d’Orliens leur nommeroit. Lesquiex, quant il furent venuz à Orliens, il en firent prendre