Si commença la besoigne forte et aspre, et s’entredonnerent moult de grans colées. Le fais de la bataille chei sus les Arragonnois ; il tornerent en fuie, mais les François les tindrent court et les enchacierent de près ; si en navrerent moult ; si en demoura ou champ de mors jusques à c, sanz ceulz qui furent navrez en fuiant. Le roy Pierre fu navré à mort et eust esté pris et retenu, quant il meismes copa les renes de son cheval et se mist à la fuie. Ne demoura gaires qu’il mourut et se mist à la fuie. Ne demoura gaires qu’il mourut de la plaie qui li fu faite[1]. Les François se partirent du champ et s’en vindrent à leurs tentes et garderent combien il leur failloit de leur gent ; si trouverent qu’il n’i avoit occis que ii tant seulement. De ce furent il moult liez et conterent au roy comment il avoient ouvré et quelle maniere de gent il avoient trouvé. Le roy en fu trop durement lié et mercia la douce Dame de l’onneur et de la victoire que Nostre Sires avoit donné à sa gent. Encore eust-il esté plus lié, s’il eust sceu que le roy Pierre eust esté navré et mort.
Si comme le siege estoit devant Gironne, viande commença à apeticier à ceulz de la cité. Le conte de Fois et Raymont Rogier savoient bien toute leur couvine, comment il leur estoit et qu’il ne se pooient plus tenir ne durer. Si s’en vindrent au roy et li
