Baudoim ot auques passez toz les jardins, grant talent ot de venir au flum qui couroit près des murs de la cité. Mais quant il aprochierent, bien lor fu contredit l’eve, et furent par force li nostre reusé arrieres. Après, se ralierent et empridrent l’eve à guenier. Aus Turs asemblerent, et fu li pognais[1] apres et fiers ; mais, la nostre gent refurent flati arrieres[2]. Li rois de France qui chevauchoit après a tote sa bataile et atendoit por secorre aus prumerains quant mestiers fu et il fusent lassé. Li empereres qui venoit darreniers[3] demanda por quoi il s’etoient aresté. L’on li dit que la prumiere bataile estoit asemblée aus Turs que il avoient trovez hors de la vile. Quant li Tyois qui pou sevent de toz atiremenz[4] d’armes et sont une genz qui riens ne puent souffrir, oïrent ce, tantost se derouterent et coururent tout à deroi. Li empereres maimes i fu. Parmi la bataile le roi de France s’en passerent tout sanz conroi juques il vindrent au pognaiz sor l’eve. Lors decendirent tuit des chevaus et midrent les escuz devant et tindrent les longues espées. Asprement coururent sus aus Turs, si que il ne le porent soufrir. Ne demora gueres que il guerpirent l’eve et se midrent dedenz la vile.
Li empereres fit à cele venue un cop de quoi l’on doit toz jors mais parler en bien, car uns Turs le tenoit moult près, qui estoit armez de haubert. Li em-
