touz li clergiez et li poples dou roiaume se convertirent à aumones et à oresons. Et li preuzdons, qui pas n’avoit vaine gloire ne presumption de ses merites, mais esperance en la misericorde Nostre Seigneur, requist à Dieu un fil par tels paroles : « Sire, je te prie que il te souviegne de moi et que tu n’entres pas en jugement contre ton serjant, car nus qui vive n’iert ja justifiez en ton regart ; mais soies propices à moi pecheor, et se je ai pechié ausi come autres hom, espargne moi toutes voies ; et se je ai riens fait en toute ma vie qui te plaise, je te proie que il ne perisse pas par mon pechié. Sires, aies merci de moi, selonc ta grant misericorde, et me done fil, hoir de mon cors, noble governeor dou roiaume de France, à la confusion de mes anemis, que il ne me peussent reprochier et dire : t’esperance est faite vaine, tes aumones et tes oresons sont peries[1]. Mais, tu, sire, selonc ta volenté, me soies misericors et commande que mes esperiz soit en pais receuz en la fin de mes jors. »
Tels proieres fesoit li rois à Nostre Seigneur, touz li clergiez et li poples dou roiaume. Et Nostres Sires, qui pas ne refusa ses proieres, li dona un fil qui ot à non Phelippe Dieudonez, que il fist norrir saintement et entroduire plainement en la foi Jhesu Crist et es commandemenz de sainte Eglise. Et quant il fu en aage covenable, il le fist coroner à Rains, à grant sollempnité ; et vesqui puis, tant que il li vit governer le roiaume glorieusement près d’un an avant que il trespassast.
[2]Une avision merveilleuse vit li rois en dormant,
