ver, pour quoi nous ne peussiens ce faire, et se il avenoit que il fust ensi ; que li uns refeist savoir à l’autre le terme du parlement qui seroit de noviau pris, et que il soit ensi endementiers que nostre amor ne soit changiée ne amenuisiée, jusques atant que Diex vuelle que ele soit du tout confermée. [1]Et si ordenons des choses des eglises, des eveschiez et des abbaïes, ou que ce soit de noz II roiaumes, si que li evesque et li abbé les tiegnent paisiblement. Et se aucuns, qui que il fust, les prenoit ne saisissoit en quelque roiaume que ce fust contre raison, que eles fussent rendues selonc droit. »
[2]A la sisiesme jornée fu ensi ordené. « [3]Pour la pais des roiaumes, pour ce que il puent aucune foiz estre troblé par aucuns homes vagues et qui riens qui maus soit ne redoutent à faire, nous volons que au quelque ce soit que tiex genz vendront, que il ne puisse fuir ne eschiver la justice de ce que il auront fait, et que nus de nous ne le reçoive ne ne retiegne à autre chose, fors en tant com il le tendra, pour amener avant à rendre raison et à faire amende selonc son fait. Et se il se defuioit de venir avant, cil en cui roiaume il se fuira le face chacer et prendre jusques il soit amenez avant pour raison rendre, ou il soit du tout baniz et essilliez des II roiaumes. [4]Si volons que cil qui par leur meffait auront perdue la proprieté de leur choses et de leur heritages, que il soient jugié selonc les anciens droiz de noz ancesors, et se il en i a nul qui die
