Lothaire, que Hues li Granz asseja en Loon, et coment il le chaça, et de l’evesque Ascelin qui le traï et ovri par nuit la cité ; coment il et sa fame furent en prison à Orliens.
Li X parole d’Arnoul l’arcevesque de Rains qui à tort fu deposez, et comment li Apostoles le restabli et escomenia les evesques qui ce avoient fait ; de la mort Hue le Grant que l’on dit Chapet ; du roi Robert et comment li Borgoignons le refuserent à segneur, et comment il aseja la cité d’Auceurre.
Li XI parole de la desloiauté Renart le conte de Sanz, et comment Leutheres, li arcevesques, prit la cité ; comment li rois Roberz ferma Monfort et Espernon ; de la lignie qui de li vint, qui cil fu qui ferma Montleheri, et de la lignie qui de lui vint, des mors le roi Robert et des dons que il dona à l’eglise Saint Denys.
Li XII parole de la lignie le roi Robert ; du coronement et de la vie le roi Henri son fil ; quant la cité de Paris fu arse et puis des messages le roi Henri d’Alemagne ; de la detection du cors saint Denys, et pourquoi il furent descovert.
Li XIII et li darreniers parole du roi Phelippe le premier et de sa vie et puis de la croiserie d’outre-mer ; comment et de [qui] il achata la contée de Borges ; comment li Apostoles escommenia France pour l’avoutire le roi Phelippe et puis de sa mort, et où il fu mis en sepouture.
I.
