LOUIS LE BÈGUE
Ci commencent li chapitre du roi Loys le Baube son fil et des autres rois après, jusques au gros roi Loys.
Li premiers parole comment Looys, qui fu apelez li Baubes, dona aus barons ce qu’il leur plesoit pour aquerre leur grâce et comment l’empererriz Richeuz li aporta l’espée et le ceptre son pere, et comment il fu coronez ; comment il passa en Berri contre les Normanz ; de l’Apostoile qui en France vint et fist concile des prelaz.
Li seconz parole comment li Apostoile refusa à coroner la roine et comment il et li prelat assemblerent à Troies, et du debat entre Hemaire et Adenofle de l’eveschié de Loon ; du mariage de la fille Boson au fil le roi ; comment li Apostoiles s’en retorna et du parlement des ii rois Looys.
Li tierz parole des convenances et de l’acort qui fu entre les ii rois, et comment il fu traitié en chascune jornée au porfit des ii roiaumes ; tout n’en fust-il après tenu par la desloiauté au roi Loys de Germanie.
Li iiii parole du departement de ii rois et de la mort le roi Loys de France qui fu apelez li Baubes, de l’abbé Gozelin et du conte Conrat et du roi de Germanie ; comment li rois Loys de Germanie vint en France et comment il s’en retorna sanz riens faire.
