renommée, et la fist venir à Saint Denys en France, tout ausi come Challes li Granz, ses aïeus, l’avoit establie à Ès la Chapele, quant il ot aportées les reliques d’outre-mer, et tout autel pardon, et toute autel franchise come ele avoit là où ele fu premierement establie. [1]Et si dona ovec, l’un des saints clous dont Nostres Sauvierres fu atachiez en la croiz parmi les piez, et grant partie des espines de la sainte corone, et le destre braz de Saint Syméon dont il reçut nostre Sauveor au jor de la Purification, quant il fu offerz au temple. Si dona un riche autel porteiz[2] de marbre pourfire, tout quarré, qui siet sor IIII petiz piez et mist ou front, devant, le braz saint Jaque, l’apostre, frere Nostre Segneur ; à la destre partie, enclost le braz saint Estiene le martyr, et ou senestre costé, le braz saint Vincent. Et pour la raison de ces III saintuaires qui dedenz sont seelé et enclos, fu-il apelez li autiex de la Trinité ; si est assis seur l’autel matinel, ou cuer du covent, et est chascun jor chantée desus la messe matinel.
Après, dona laienz le henap Salemon[3] qui est d’or pur et d’esmeraudes fines et fins grenez, si merveilleusement ovré que en toz les roiaumes du monde ne fu ainques ovre si soutille. Ovec ce, dona laienz une grant croiz de fin or qui est devisée en IIII parties, et si est aronée de grant plenté de fines pierres precieuses, et aus IIII chiés de cele croiz sont seelées et encloses soutiment precieuses reliques de cors sains, en chas-
