voies fu la fins tele au derrenier, et li home le conte Lambert[1] l’occistrent en sa maison meismes.
Quant tuit cit message s’en furent parti et li parlemenz fu finez, li empereres s’en ala chacer en la forest de Vouge[2]. Jusques au moys d’aoust demora en ce deduit ; après retorna à Es la Chapele pour tenir le parlement que il i ot fait devant crier ; là fu la pais confermée que li Normant requeroient.
Après ce parlement, envoia Looys, le mendre de ses fiuz, en Baiviere, et il repaira à Noion[3] entre li et son fil Lothaire. Tout le moys de septembre se deduist en chace de bois ; vers le commencement de l’yver s’en ala à Es la Chapele ; assez tost après fist assembler parlement. Là vindrent derechief li messager le roi de Bulgrie qui moult portoit grief ce que li empereres li avoit mandé par lettres, et ce que il n’avoit pas empetré vers l’empereor ce que il requeroit. Pour ce, avoit arriers envoiez ces messages et li mandoit par grant presumption, si com il estoit contenu en sa lettre, que certaines bonnes fussent entre les ii roiaumes, ou que il gardast ses marches au mieuz que il prroit. De ce fu toute la corz esmeue et disoient tuit que li rois qui ce mandoit avoit bien deservi à perdre terre. Et pour ce que li empereres voloit estre certains se cil rois avoit ce mandé ou non, commanda-il que li messages fust retenuz jusques atant que l’on eust là envoié ; et pour cete chose i fu envoiez Bertriques li cuens dou
