lieu où il preechierent la foi et où lor cors reposent. L’eglise de Rome est avant mise ; car sains Peres, li princes des apostres, la dedia par sa predication et sacra par le sanc de sa passion. La seconde est cele de Compostele ; car mesires sains Jaques, qui après saint Pere ot plus de grâce et de dignité, la consacra premierement par son sanc et par sa predication. La tierce doit estre cele d’Ephese, en laquele sains Jehans li evangelistres escrist cele excellent evangile : In principio erat verbum et l’Apocalipse, où il nous descovre les celestiaus secrez ; qui tant ot de grâce envers Nostre Seigneur, que il ot le privilege de s’amor sor touz les autres. Tant doivent avoir ces iii eglises d’onor et de dignité que se jugement, soient divin, soient humain, ne puent estre terminé aus autres eglises qui sont par tout le monde, il doivent estre traitié en defeni en ces iii eglises.
En la maniere que l’estoire a lassus raconté, fu Espagne et Galice delivrée des mains des Sarrazins par la vertu de Nostre Seigneur et de monseigneur Jaque et par l’aide Karlemaine.
[1]Ci endroit, fait l’estoire mencion des mors et de la quantité[2] Karlemaine et de sa maniere de vivre. Voirs est que ele a lassus parlé de ce meismes, et se l’on demandoit pourquoi ele en parole en ii lieus, l’on porroit respondre que ce est selonc divers actors ; car Eginalz qui fu ses chapelains et d’enfance norriz en son palais, et fu touz jors presenz en touz ses faiz, met la
