Lors li demanda Fernaguz quele loy li François tenoient ; et Rolant li respondi : « Nous somes », dist-il, « crestien par la grâce Nostre Seigneur, et tenons les commandemenz Jhesu Crist ; et si estrivons et nous combatons pour la foi tant comme nous poons. »
Quant li païens oï le non Jhesu Crist : « Qui est », dist-il, « cil Criz que tu croiz ? » Et Rolant respondi : « Ce est », dist-il, « Fiuz Dieu le pere qui de Virge vot naistre, soufrir mort en la croiz pour noz pechiez, et fu ou sepulchre enseveliz, et au tierz jor resuscita du sepulchre et retorna es ciex à la destre du Pere, où il regne et regnera sanz fin. » Lors, li dist Fernaguz : « Nous creons », dist-il, « que li Crierres[1] du ciel et de la terre est uns seus Diex, ne ainques n’ot ne fil ne pere, et ausi, com il n’est engendrez de nului, ausi n’engendra-il ainques nului, dont il semble donc que il soit uns seus Diex et ne mie trine. »
« Tu diz voir », dist Rolant, « quant tu diz que il est un seus Diex ; mais tu cloches en la foi, quant tu diz que il n’est pas trines ; car qui croit ou Pere, il croit ou Fil et ou Saint Esperit, car Diex est Peres et Fiuz et Saint Esperiz et uns seus Diex qui parmaint en ces iii persones. »
Lors, respondi Fernaguz : « Se tu diz », dist-il, « que li Peres soit Diex, li Fiuz soit Diex et li Saintz Esperiz Diex, dont sont-il iii Dieu et non mie uns seus. »
« Il n’est pas ensi », dist Rolant, « mais un seul
- ↑ Li Crierres, le Créateur.
