loys plaist mieuz à Dieu que la vostre, que vous soiez vaincuz, et se la vostre vaut mieuz, que vous soiez vainqueor. Si soit hontes et reproches touz jor mais aus vaincuz et loenge et honors aus vainqueors, et se il avient chose, que nostre gent soit vaincue, je rechevrai baptesme, se je puis tant vivre. »
Ensi fu otroié d’une part et d’autre, et se departirent a tant. Lors envoia Karlemaines xx crestiens contre xx Sarrazins et tantost furent li païen occis, et puis xl contre xl ; si refurent ausi occis li Sarrazins, et puis c contre c, et refurent ausi occis li païen, et puis c encores contre c ; mais à cele foiz, furent li crestien occis pour ce que il fuirent pour paor de mort. Cist qui ensi morurent pour ce que il fuirent, segnefient la parece d’aucuns, qui laschement se combatent contre les vices ; car ausi come cil qui se combatent pour la foi ne doivent ainques fuir ne resortir[1], ausi ne doivent cil qui se combatent contre le deable ; car se il resortissent, il morront es pechiez. Mais cil qui forment se combatent vainquent legierement le deable qui les pechiez amenistre.
Après furent envoié cc contre cc, et puis m contre m, et touz jors furent occis li Sarrazins. Lors, requist Aygolant trives à Karlemaine pour parler à li et dist que la foi crestiene valoit mieuz que la lor. A Karlemaine vint et li dist que il et sa gent recevroient baptesme l’endemain. A tant retorna à sa gent et dist a ses rois et à ses princes que il voloit estre baptiziez, et commanda à toute sa gent que il s’apareillassent à recevoir baptesme, dont aucun s’i consentirent et aucun le refuserent.
- ↑ Resortir, se retirer.
