pour les guerres des Esclavons. Li empereres le reçut moult debonairement pour ce meesmement que il estoit bons crestiens ; sa requeste li otroia, dons li dona et puis s’en retorna ; mès il ne vesqui pas puis longuement que il fut repairiez à sa gent. Kaganes, qui après lui fu sires des Huns, requist à l’empereor par un de ses princes que il li soffrist à avoir autel honor et autel seignorie entre les Huns, come Capanes ses devanciers soloit avoir, et li empereres li otroia volentiers ce que il requeroit, et vot que il eust la cure de la seignorie de tot le roiaume selonc les ancienes costumes du païs.
En cele année meesmes, assembla li empereres ost ; à Challe, son fil, le livra pour conduire sor les Esclavons qui sont apelé Behem[1]. Toute lor terre degasta et occist lor prince qui avoit non Bechones, puis retorna à son pere en la forest de Vousague, en une lie qui est nomez Chans[2] ; car li empereres s’estoit departiz d’Es la Chapele le mois d’aoust et estoit passez en cele forest par la cité de Mez et de Theodone[3]. Et quant li oz que Challes ses fiuz ot mené en Esclavonie fu departiz, il repaira pour yverner à Theodone. A li vindrent là si dui fil, Pepins et Looys, et celebrerent ovec lui la sollempnité de la Nativité.
[4]Après la feste, vindrent à lui dui duc des Veniciens, Gileriques et Benoiz, et uns autres dux de Jadere[5]
