Auant que passer plus outre, pource qu’infinis se sont travaillez de donner la cause pourqvoy on peint deux ff. (que les postes appellent febves frites) pour signifier Digesta : j’ay bien icy voulu rapporter la diversité de leurs opinions. Alciat en ses Depunctions, & apres luy Coras en ses Miscellanees disent, que les anciens, qui avoient accoustumé d’appeller les Digestis, Pandectes, selon qu’encor on les surnomme aujourd’huy, pour les signifier peignoient un π, Grec avec l’accent circumflex, en ceste façon, ^π Qui a donné occasion aux ignorans de la langue Grecque, d’estimer que ce fussent deux ff. en lettre Romaine.
Catellianus Cotta libr. memora. apres une enumeration de quelques Notes antiques, dit qu’on les a signifié avec deux ff. qui selon les anciens denotent facta fuerunt, d’où mesme on les a appellé Digesta quasi deposita.
Charles Estienne en l’Epistre qu’il a fait à la commendation des Regles de Droit dit, que ceste Note est prouenuë ex D. transfixo sic : qui a donné occasion de penser que ce fussent deux ff.
Quant à moy, je puis asseurer que j’ay des Annotations cuiusdam incerti, doctes & elegantes sur les Institutes, lesquelles j’ay envoyé à monsieur Cujas, où tousjours les Pandectes ou Digestes sont alleguees par ceste marque qui est un vray D, avec une ligne au travers.
Ottoman au Tiltre de Act. asseure qu’un des plus curieux scrutateur des antiquitez que l’on sçauroit dire, le sieur du Tillet, luy a monstré, & à Balduin aussi, un semblable D. in libro notary Iuris Civilis fort antique, qui signifioit Digesta. Voylà ce que j’ay a dire sur ce mot, Ne nescius esset.
Quant aux autres Notes de Droict, elles sont faciles,
