De nostre temps Capilupus Mantuanus a composé de ceste forte la Vie monachale & son Gallus, aussi heureusement qu’il se pourroit dire, & pense que pour ce regard il soit immitable. Les forts Vergilianes, dont faict mention Lampridius, Gregorius Turonensis, & Rabelais, sont aussi tirez au hazard du mesme autheur. Mais pour ce qu’au chapitre des Divinations liv. 2. J’en parleray amplement, je diray encor des Pasquils, qu’ils sont souvent tirez des vers dudit Virgile : & aujourd’huy les plus frequentes se tirent de la saincte Escriture, tantost comme de la Passion, des sept Pseaumes, & autres, desquels aussi tu auras au second livre un Chapitre à part : Car les beaux exemples que j’ay, le meritent bien. Pour conclusion, je finiray ces exemples de vers, sur la gentille invention de Theodoric Poëte Grec, qui a fait le premier & fabriqué des vers si ingenieusement, que par la figure ils representent un Arc, une Aile, & autres figures, comme aussi il me souvient d’avoir leu l’Oent : Estant Escholier à Paris 1574. j’ay fait la Coupe Poëtique, la Marmite, & autres : Mais pour ceste heure, tu te contenteras du Tombeau du feu sieur Tabourot, Advocat Dijonnois, cloquent & sçavant personnage, que son fils mien compagnon aux Universitez, bastit ainsi l’année qu’il publia la version Latine du Fourmy de Ronsard, & du Papillon de Belleau.
Je ne sçay comme j’avois oublié la Sextine, que ce grand Pontus de Tyard, & seigneur de Billy, a le premier d’Italien habillé à la Francoise : qui est une Poësie pauvre de ryme, & riche d’invention : Car il faut rymer six fois sur un mesme mot, outre la conclusion de quatre vers. Voicy l’exemple, tiré de ses œuvres Poëtiques :
