Bonne trouppe de gens, dont il se tient heureux,
Va chez luy pour joüer toutes sortes de jeux,
Et n’agueres pourtant n’avoit ny croix ny pille.
Ha ! j’entens bien le per, ces jeux sont les rapeaux,
Par lesquels il attire à son moulin les eaux
De plusieurs gens ausquels sa femme il abandonne
Ayant donc tel moyen, n’a-il pas bien raison
De marcher comme un Roy, qui porte en sa maison.
Cent cornes sur son chef luy servans de couronne ?
La suyvante Description est d’un gros Raminagrobis, qui avoit promis à la partie de le faire absoudre. Car il devoit tant cracher de Loix, qu’il feroit perdre haleine à son adversaire, mais il devint du contraire : Car il plaida si confusement que rien plus, dequoy sa partie, qui estoit un jeune Escholier prisonnier, fit ce Huictain :
Ce rote loix, ce crache-paragraphe,
Vesse-verset, authentique souflant,
Pete-canon, Decretalimouchant,
Extravagant d’un droict qui tout agraphe :
N’a peu si bien avec sa grand’ piaffe
Rotter, cracher, vesser, soufler, peter :
Extravaguer, Decretalimoucher
Que par sa voix on m’ait d’onné le taf.
T. litera apud Græcos, nota est absolutionis.
Nos Poëtes François, nommément du Magny, se sont plus aux diminutifs d’une fort bonne grace. Car ils font de petitelettes descriptionnettes, qui sont fort agreablettes aux aureillettes delicatelettes, principalement des mignardelettes : Comme,
