Pales, le Dieu chevrier, & le pasteur d’Amphrise :
D’un chapelet de fleurs couronnant le premier,
D’une branche de pin le second, le dernier,
D’un tortis de Laurier, Mais Perot l’outrepasse
Ce berger, ce chevrier, & ce bouvier surpasse,
D’autant que les moutons, les boucs & les taureaux,
Les aigneaux, les chevreaux, & les jeunes bouveaux :
Ou que les bleds, les monts, les maisons royales
Les herbes, les costaux, les cases pastorales :
Tant Perot fluste bien, fredonne, & sonne icy,
Du flageol, du rebec, & du cornet aussi,
Son Charlot, son Annot, son Henriot, les maistres,
Des prez & des costaux, & des loges champestres.
De mesme grace est aussi l’Epitaphe qui se trouve emmy les œuvres dudit Poëte, sur la mort du sieur de Bonnivet ; que je mettray icy pour donner plaisir aux studieux de la Poësie :
La France, & le Piedmont, & les cieux, & les arts,
Les soldats, & le monde ont fait comme six parts,
De ce grand Bonnivet : car une si grand’ chose
Dedans vu seul tombeau ni pouvoit estre enclose,
La France en a le corps ; qu’elle avoit eslévé :
Le Piedmont a le cœur, qu’il avoit esprouvé :
Les cieux en ont l’esprit, & les arts la memoire,
Les soldats le regret, & le monde la gloire.
