Page:Tabourot - Les Bigarrures et Touches du seigneur des Accords - 1640.djvu/200

puis en ceste sorte les faisoit transporter dans ce lieu, mettre en un riche lit, au milieu d’une sale, où il y avoit infinis flambeaux. Erdonnoit ordre qu’à leur resveil ils entendoient une harmonie tres-exquise & avoient autour d’eux, trois ou quatre de ces filles, habillees en Nymphes, qui les servoient & accommodoient de riches habits, puis les menoient en une chambre richement tapissee, où ils trouvoient une table garnie de toutes les exquises viandes qu’on pourroit souhaiter. De là, on les menoit solacier par tout ce lieu, & leur estoit permis de choisir à leur appetit, telle fille qu’ils vouloient. Puis ayant gousté ces plaisirs l’espace de sept ou huict jours, & qu’on les voyoit enyvrez de tels delices, on leur donoit derechef, avant que se mettre au lict, une potion soporifere, comme auparavant. Et avant qu’elle commençast son operation arrivoit un grand vieillard, eslevé sur un throsne environné de petits enfans aislez, qui leur faisoit entendre qu’il estoit Mahomet, grand Prophete ; & que s’ils vouloient estre sauvez, & jouyr à perpetuité de ceste douce vie, qu’ils avoient gousté, qu’il falloit qu’ils allassent tuër certains Princes & Seigneurs, qu’il leur nommait (comme Tyrans desagreables à Dieu) & les exortoit tellement, outre ce qu’ils estoient allechez, qu’estans apres transportez endormis lors de ce chasteau, ils n’espargnoient leur vie, pour l’esperance qu’ils avoient apres leur mort, de revivre si joyeusement. De sorte qu’en l’an mil deux cens cinquante six, un peu apres la mort du Roy Louys, il y en eut un si osé, qu’il vint jusques dedans la tente du Prince de Galles, qui estoit devant la Cité d’Acres, lequel il voulut frapper droict au cœur d’un cousteau. : mais il fut soudain mis à mort, & n’en retourna pas dire des nouvelles en son joyeux Paradis. Nos Anales en la vie du Roy Philip-