Page:Scudéry - Artamène ou le Grand Cyrus, troisième partie, 1654.djvu/558

qui m’apartenoit : mais c’eſt enfin que je ne me ſuis abandonné à la douleur & au deſespoir, que lors que cette perte a eſté un obſtacle à mon amour. Ainſi on peut preſques dire, que je n’ay ſenti l’ambition, que quand j’ay eſté amoureux. Mais Seigneur, pour vous aprendre la perſecution que j’ay ſoufferte, & par la Fortune, & par l’Amour : il faut que je vous die que je ſuis fils de Thraſibule Prince de Milet, du quel je porte le Nom : qui tant qu’il a veſcu, a eſté Amy particulier de Periandre Roy de Corinthe ; & de qui le Nom a eſté aſſez connu durant ſa vie, par la guerre qu’il eut onze ans durant contre Sadiatte petit fils de Gyges, & contre Aliatte Pere de Creſus, qu’il finit avec aſſez de bonheur, d’adreſſe, & de gloire, pour vous la raconter en peu de mots : puis que ce qui ſuivit bien toſt apres, eſt le fondement de tous mes malheurs. Cette guerre, Seigneur, eſtoit d’autant plus conſiderable, qu’elle avoit commencé durant le regne de Giges, lors qu’il uſurpa la Couronne ſur les Heraclides : car depuis cela, Ardis qui luy ſucceda la fit encore durer, comme fit en ſuitte Sadiatte ſon fils ; & apres luy, comme je l’ay deſja dit, Aliatte fit la meſme choſe. Le Prince mon Pere eſtant donc aſſez occupé au commencement de ſon regne, pour affermir dans ſa Maiſon la Souveraine authorité, qui effectivement luy appartenoit, quoy que ſes ennemis en ayent voulu dire : il ne pût pas durant les premieres années qu’il ſoutint cette guerre contre Sadiatte, s’y oppoſer avec toute la force qu’il euſt pû, s’il n’euſt point eu d’ennemis au dedans de ſa Ville. Mais ne voulant pas en ſortir, de peur que ſon abſence ne donnaſt lieu aux ſeditieux de remuer, Sadiatte eſtoit Maiſtre de la Campagne : & il fit cette guerre pendant ſix