la devoit porter : elle eſcrivit auſſi un Billet à la Princeſſe Ariſtée : & apres avoir fait beaucoup de civilité à ce fidelle Agent de Spitridate, elle le congedia : & l’Eſclave qui l’avoit amené, le reconduiſit juſques hors de la Ville où il logeoit. Vous pouvez juger quelle fut la converſation de la Princeſſe & de moy : & combien de fois nous releuſmes la Lettre de Spitridate. Cependant ſa priſon n’agit pas ſeulement dans le cœur de la Princeſſe Araminte, mais encore dans celuy du Prince Sinneſis : qui ne croyant plus qu’il euſt sçeu le deſſein d’Arſamone, ne le ſoubçonna plus auſſi de l’avoir trompé, non plus que la Princeſſe Ariſtée : de ſorte que l’amour reprenant ſa place dans ſon eſprit, il changea ſa façon d’agir. Il vint voir la Princeſſe ſa Sœur, pour en parler avec elle : & comme il eſtoit important à Araminte que le Prince Sinneſis aimaſt touſjours Spitridate, elle le confirma en ſon opinion : ſi bien que ſa paſſion redevenant plus forte, il ceſſa d’aigrir l’eſprit du Roy ſon Pere, comme il faiſoit auparavant : & il voulut meſme à diverſes fois l’appaiſer : Mais comme ce Prince en ſoubçonna aiſément la cauſe, il s’en faſcha extraordinairement, & luy en donna meſme des marques.
A quelques jours de là, il apprit que Ciaxare (qui n’eſtoit en ce temps là comme vous le sçavez que Roy de Capadoce & de Galatie) aſſistoit ſous main Arſamone : de ſorte que voyant cette affaire d’une plus dangereuſe ſuitte qu’il n’avoit preveû d’abord, il ſouhaita que les choſes ſe puſſent pacifier, auparavant que ſon ennemi fuſt en eſtat de luy nuire. Il envoya donc vers Ciaxare, pour luy demander ſecours : faignant de ne sçavoir pas que ce Prince aidoit ſecrettement à Arſamone. Celuy qui fut envoyé vers luy, s’
