d’y pacifier les choſes, & de ſatisfaire s’il eſtoit poſſible, & ſon honneur, & ſon amour. Qu’ainſi pour executer ſon entrepriſe, il s’eſtoit aquis ce vieux Peſcheur par une tres belle Bague qu’il avoit ſur luy : de ſorte qu’il l’avoit envoyé à la Ville avec quelque argent que ce Prince avoit ; pour luy acheter les choſes neceſſaires à ſe déguiſer, & pour faire ſon voyage : comme pour s’informer auſſi s’il n’eſtoit arrivé nul accident au Roy, de qui il ſe diſoit ſeulement Officier. Que cét homme ayant aporté les choſes dont il avoit beſoin, luy avoit apris que le Roy & la Reine de Bithinie, le Prince Euriclide, & la Princeſſe leur Fille eſtoient échapez du naufrage : mais qu’ils eſtoient bien affligez, de ce qu’ils craignoient que leur Fils aiſné n’euſt peri : & que tout le rivage de la Mer eſtoit plein de gens, que le Roy envoyoit chercher le Prince, vivant ou mort. Qu’on luy avoit demandé à cent pas de là, s’il n’en sçavoit point de nouvelles : & qu’il avoit dit que non. Qu’en ſuitte Spitridate craignant d’eſtre trouvé, s’eſtoit déguiſé promptement : qu’auſſi toſt que la nuit avoit eſté venuë, il eſtoit monté ſur un Cheval que ce Peſcheur luy avoit acheté : & qu’apres luy avoir bien recommandé de cacher ſes habillemens, & de ne les monſtrer point, qu’il n’y euſt du moins pluſieurs jours qu’il fuſt parti, il s’eſtoit mis en chemin. J’oubliois pourtant de vous dire, qu’il laiſſa un Billet à ce Peſcheur, avec ordre d’aller dans huit jours le porter à quelque Officier de la Maiſon d’Arſamone ; où il avoit eſcrit ces paroles.
Aſſurez le Roy mon Pere, que Spitridate n’eſt pas mort : & que n’eſtant pas capable de rien faire
