Je ſuis ſi malheureux, que quelque innocent que je ſois, je ne laiſſe pas d’avoir lieu de craindre que vous ne m’ayez ſoubçonné d’avoir plus d’ambition que d’amour : & d’apprehender encore, que vous ne m’ayez condamné ſans m’entendre. Celuy qui vous rendra ma Lettre, a ordre de vous raconter la verité toute pure ; afin que la connoiſſant, vous ne me faciez pas une injuſtice. La priſon où je ſuis me ſera bien douce, ſi elle me juſtifie aupres de vous : & bien inſuportable, ſi j’aprens que vous continuyez de m’accuſer : puis qu’elle m’empeſchera d’aller vous dire moy meſme, que je quitterois toutes les Couronnes de l’Univers, pour la ſeule gloire d’eſtre regardé favorablement de vous. Ne me ſoubçonnez donc pas, s’il vous plaiſt, d’en avoir voulu reconquerir une en vous perdant : & croyez, au contraire, que je prefereray touſjours la glorieuſe qualité de voſtre Eſclave, à celle de Roy de toute l’Aſie.
