Page:Scudéry - Artamène ou le Grand Cyrus, troisième partie, 1654.djvu/347

a une paſſion dans l’ame : il sçeut ſi bien conduire la choſe, que ſans choquer la bien-ſeance, ny la preſſer trop, il l’obligea à conſentir qu’il sçeuſt tous les malheurs de ſa vie ; afin de voir apres par quels moyens il l’en pourroit ſoulager, comme elle eſtoit reſoluë de faire auſſi ceſſer les ſiens s’il eſtoit poſſible. Un matin que Cyrus aprit que Ciaxare arriveroit dans trois jours, & que le Roy d’Armenie n’avoit pas de vivres pour longtemps : ayant l’eſprit un peu plus tranquile, par l’eſperance d’eſtre bien toſt en pouvoir de s’eſclaircir par le Roy d’Armenie luy meſme, du lieu où eſtoit ce qu’il cherchoit : il fut trouver la Princeſſe de Pont, & la ſommer de luy tenir la parole qu’elle luy avoit donnée. Mais quoy qu’elle vouluſt le contenter pour ſon propre intereſt, elle ne pût obtenir d’elle meſme, la force de raconter ſes avantures de ſa propre bouche : & elle le ſupplia de trouver bon qu’une perſonne qui eſtoit à elle, & qui sçavoit juſques à la moindre de ſes penſées, les luy apriſt. Cyrus conſentant à ce qu’elle vouloit, ſe retire à l’heure meſme : & auſſi toſt qu’elle eut diſné, il retourna dans ſa Chambre : où il trouva celle qui luy devoit apprendre les malheurs de la Princeſſe de Pont ; qui s’eſtoit retirée dans un Cabinet, avec quelques Femmes d’Armenie, que l’on avoit miſes aupres d’elle pour la ſervir. Cette Perſonne qui ſe nommoit Heſionide, eſtoit ne Fille de qualité, originaire de Bithinie, de qui la Mere avoit eſté Gouvernante de la Princeſſe, & qui l’avoit preſque eſté elle meſme : parce qu’ayant ſix ou ſept ans plus qu’Araminte ; ſa Mere qui eſtoit fort avancée en âge, & fort mal ſaine, luy en avoit ſouvent donné la conduite. De ſorte qu’elle sçavoit fort exactement tout ce qui s’eſtoit paſſé en cette Cour là : & comme c’eſtoit