Page:Scudéry - Artamène ou le Grand Cyrus, troisième partie, 1654.djvu/315

Troupes qui la compoſoient ; on reſolut que l’Avant-garde commenceroit de filer dans ſix jours, & s’avanceroit juſques ſur la Frontiere, où tout le reſte la ſuivroit bientoſt apres. Cyrus avoit alors l’eſprit tout rempli d’eſperance : car voyant une ſi grande & ſi belle Armée, & tant de Princes & tant de Rois engagez dans ſon party : il avoit lieu de croire, que la victoire luy eſtoit preſque aſſurée : & que ſi le Roy d’Armenie ne rendoit pas la Princeſſe, & n’avoüoit pas meſme qu’elle fuſt dans ſes Eſtats ; c’eſtoit qu’il vouloit qu’on luy offriſt de le décharger du Tribut qu’il devoit aux Rois de Medie. Ce n’eſt pas que Cyrus ne fuſt un peu embarraſſé à concevoir ce qu’eſtoit devenu le Roy de Pont, dont Megabiſe ne parloit point, & dont il n’avoit point entendu parler à Anaxate : & qu’il n’euſt beaucoup de peine à s’imaginer ce qui avoit pû le ſeparer de la Princeſſe, ou obliger le Roy d’Armenie à le retenir auſſi bien qu’elle : puis que ſa priſon ou ſa liberté ne faiſoient rien à ce Tribut dont il ſe vouloit décharger, & pour lequel apparemment il n’avoit point voulu rendre Mandane, ny advoüer qu’elle fuſt dans ſes Eſtats. Mais eſperant eſtre bientoſt eſclaircy de ſes doutes en la delivrant, il eſtoit auſſi guay, que le peut eſtre un Amant abſent, qui eſpere de revoir bientoſt ſa Maiſtresse, & de vaincre ſes ennemis. Jamais il n’avoit eſté plus civil, ny plus liberal envers les Capitaines & les Soldats : il eſtoit continuellement occupé à demander quelque choſe pour eux à Ciaxare : qui ayant renouvellé dans ſon cœur toute la tendreſſe qu’il avoit euë autreſfois pour luy, lors qu’il ne le croyoit eſtre qu’Artamene ; ne ſe laſſoit non plus de luy accorder tout ce qu’il luy demandoit, que Cyrus