quatre : que Philocles quoy que non-aime, n’eſt pourtant pas le plus infortuné de tous ; puis qu’apres tout, ce qui fait ſon mal, pourra peut-eſtre cauſer un jour ſa gueriſon. Et pour Leontidas, je ſoustiens qu’il eſt le moins à pleindre, bien que je ſois perſuadée qu’il ſouffre plus que tous les autres enſemble : Et je declare enfin, que le Prince Artibie en pleurant ſa Maiſtresse morte, eſt le plus digne de compaſſion ; & celuy de tous pour qui j’ay le plus de pitié, quoy que je ſente auſſi les malheurs des autres : à la reſerve du jaloux Leontidas, pour qui j’ay beaucoup d’eſtime, & point du tout de compaſſion.
A peine Marteſie eut elle achevé de prononcer ſon Arreſt, que Leontidas prenant la parole ; ne vous ay-je pas dit, luy repliqua t’il, que c’eſt un de mes malheurs, de n’eſtre pleint de perſonne ? Quoy qu’il en ſoit, reprit Cyrus, je trouve que Marteſie a eſté fort equitable en ſon jugement : le reſpect que j’ay pour elle, dit Thimocrate, m’empeſchera de m’en pleindre : je ne ſuis pas ſi raiſonnable que vous, pourſuivit Philocles, puis que je vous advouë que je m’en pleins un peu : Je vay bien plus loing encore, adjouſta Leontidas, car je m’en pleins infiniment : & pour moy, dit Artibie, je m’en louë beaucoup : puis qu’il eſt vray que la pitié que cette illuſtre Perſonne a de mes maux, eſt la premiere conſolation que j’ay eſprouvée, depuis la perte que j’ay faite. Comme il eſtoit deſja fort tard, Cyrus ſe leva ; & apres
