Leontidas, meritent plus voſtre compaſſion que les miens, par la grandeur de leur merite. Ainſi rendant juſtice à l’infortune & aux infortunez tout enſemble ; j’auray autant de ſujet de me loüer de voſtre equité, que j’en ay me pleindre de mon deſtin. Le Prince Artibie acheva ſon diſcours avec un ſaisissement de cœur ſi grand, qu’à peine pût il en prononcer les dernieres paroles dinſtinctement, tant le ſouvenir de la mort de Leontine toucha fortement ſon eſprit. Sa melancolie paſſa meſme de ſon ame, dans celle de toutes les illuſtres Perſonnes qui compoſoient cette Compagnie : & il fut pleint avec tendreſſe de ceux meſme qui luy diſputoient le premier rang parmi les infortunez. Ils ne manquerent pas de prendre garde à cét ingenieux & paſſionné ſilence, par lequel il avoit ſuprimé le reſte de ſes avantures, depuis la mort de la belle Perſonne qu’il aimoit ; comme ayant voulu dire tacitement, qu’apres cette mort il n’avoit plus de part à la vie : & qu’il comptoit pour rien tout ce qu’il avoit veſcu, ou pluſtost langui depuis, Ils ne ſe rendirent pourtant pas : & apres que cette humeur ſombre qu’un recit ſi funeſte avoit cauſé dans leur eſprit ſe fut un peu diſſipée, chacun ſoustint encore ſon opinion, & la ſoustint meſme avec chaleur. Mais Cyrus qui voyoit qu’il eſtoit deſja aſſez tard, dit à Marteſie qu’il eſtoit temps que Leontidas diſt ſes avantures & ſes raiſons, ſi elle les vouloit juger ce jour là : de ſorte que leur impoſant ſilence à tous, en qualité de leur Juge qu’elle eſtoit ; elle ordonna ſeulement à Leontidas de parler, ce qu’il fit de cette ſorte.
L’AMANT JALOUX.
