Page:Scudéry - Artamène ou le Grand Cyrus, troisième partie, 1654.djvu/165

faire. Et pour continuer de luy faire encore la guerre, Philiſte, luy dit elle en la quittant, ſouvenez vous que je vous ay priée de cacher demain la moitié de vos charmes, quand vous viendrez au Palais : alors ſans donner loiſir à Philiſte de reſpondre, le Chariot marcha ; & Eumetis fut trouver le Prince Cleobule dans ſon Cabinet, où il eſtoit retiré il y avoit deſja long temps. De ſorte que je n’eſtois plus aupres de luy : & ce ne fut que le lendemain qu’Antigene & moy euſmes l’honneur de la ſalüer. Mais ce qu’il y eut d’admirable, fut que lors que le Prince Cleobule nous fit la grace de nous preſenter à elle, le matin comme elle alloit au Temple, & qu’elle traverſa un Jardin où nous eſtions apres du Prince ſon Pere ; elle trouva tant de conformité entre Antigene & moy, que n’ayant pas entendu nos Noms bien diſtinctement, elle douta lequel des deux eſtoit celuy dont la Princeſſe Cleobuline luy avoit parlé dans ſa Lettre. De ſorte que nous en faiſant un compliment qui nous obligeoit tous deux ; elle me mit dans la neceſſité de me faire connoiſtre, en luy diſant que j’eſtois celuy pour qui la Princeſſe Cleobuline luy avoit parlé, comme en ayant ſeul beſoin. Joint, luy dis-je, Madame, qu’elle n’a pas sçeu qu’Antigene deuſt venir icy : elle redoubla alors ſa civilité : & Antigene ayant fait connoiſtre parce qu’il luy dit, qu’il n’eſtoit pas une perſonne ordinaire ; nous l’accompagnaſmes au Temple : & l’apreſdisnée nous fuſmes chez elle, où elle me parla tres long temps de la Princeſſe Cleobuline, avec tous les teſmoignages d’eſtime & d’amitié qu’il eſt poſſible de rendre. Elle me demanda ſi elle n’eſtoit pas touſjours la plus belle choſe du monde ? Elle s’informa de ſes plaſirs, & de ſes