chercher dans la Caſſette d’Artamene, qui dans la croyance où il eſt d’eſtre delivré, n’aura pas fait de difficulté de conſerver la Lettre que Marteſie luy a envoyée aujourd’huy : Et ſi outre cela, elle s’aſſuroit encore d’Artucas, de Marteſie, de Feraulas, & de Chriſante. De plus, adjouſta t’il, comme aſſurément la naiſſance d’Artamene eſt fort baſſe, je voudrois contraindre ſes Gens à me la dire preciſement : parce que la choſe eſtant connue telle, cette connoiſſance ſeroit trois effets : car cela rendroit ſon crime plus grand envers la Princeſſe ; ſon ingratitude plus noire envers vous ; & pourroit meſme guerir l’eſprit de Mandane, s’il eſt vray, comme il y a aparence, qu’elle ait reçeu dans ſon cœur quelque affection pour Artamene. Ciaxare qui avoit l’eſprit fort aigry, ne conſidera pas combien ce deſſein eſtoit dangereux à entreprendre : au contraire, il creut que s’il faiſoit effectivement voir aux yeux de tous ces Rois & de tous ces Princes, qu’Artamene eſtoit un traiſtre ; qu’Artamene eſtoit un homme de tres baſſe naiſſance ; & qui avoit abſolument perdu le reſpect qu’il devoit à la Princeſſe ſa Fille ; ils abandonneroient ſa protection, & ſeroient les premiers à luy conſeiller de le perdre. Ce n’eſt pas qu’il ne ſe trouvaſt un peu embarraſſé à choiſir ceux qu’il employeroit pour executer ſes ordres : Mais comme Metrobate eſtoit auſſi hardy que meſchant-il s’offrit, pourveû que ſa Majeſté luy en donnaſt le pouvoir, de faire luy meſme tout ce qu’il luy avoit conſeille.
Cixare fut pourtant encore long temps à reſoudre : mais enfin il creut que la premiere choſe qu’il faloit faire, eſtoit de voir la Caſſette d’Artamene. Et pour cét effet, il envoya ordre à Andramias par Metrobate de la luy donner : Metrobate
